Россиянинг «Интер РАО» энергетика компанияси кузда Ўзбекистонга электр энергияси етказиб беришни бошлаши мумкин. Бу ҳақда компания бошқаруви аъзоси ва кузатув кенгаши раиси Александра Панинага асосланиб, «ТАСС» хабар берди.
«Россия электр энергияси зарурат, у кузгача берилиши керак бўлади. Ўйлайманки, кузгача Қозоғистоннинг режалари Ўзбекистон энергетика тизимига қандай ҳажмларни ўтказиши мумкинлиги борасида аниқроқ ишлаб чиқилади», — деди у Санкт-Петербург халқаро иқтисодий форуми чоғида журналистларга.
Февраль ойида «Интер РАО» (Россиядаги электр энергияси импорт-экспорт бўйича ягона оператор) вакили Ўзбекистонга электр энергиясини экспорт қилиш имкониятларини ўрганиш ҳақида гапирганди.
«Қийинчилик шундан иборатки, уни Қозоғистон орқали транзит йўлда, блокланган Шимол-Жануб участкаси орқали етказиб бериш керак, у орқали етказиб бериш Қирғизистонга амалга оширилмоқда, Ўзбекистонга ҳажм ажратиш қийин», — деганди Александра Панина.
Владимир Путиннинг Тошкентга ташрифи чоғида Россия энергетика вазири Сергей Цивилев Россия ва Ўзбекистон нафақат газ, балки электр энергияси етказиб бериш ҳажмини сезиларли даражада ошириш бўйича фаол музокаралар олиб бораётганини айтгганди. Ҳажмлар эса ҳамон музокаралар мавзуси бўлиб қолмоқда.
Шу билан бирга, май ойида Ўзбекистон энергетика вазири Жўрабек Мирзамаҳмудов Uzreport TV телеканалига берган интервьюсида мамлакатга электр энергияси импорти чоракка — 4 дан 3 миллиард кВт/соатга камайганини маълум қилганди. Унинг сўзларига кўра, қуёш ва шамол электр станцияларининг ишга туширилиши ва иссиқлик электр станцияларининг самарадорлигини ошириш тақчилликни қоплаш ва энергия экспорти истиқболларини очиш имконини берди (Европага «яшил» энергия етказиб бериш режалаштирилган).
Ҳозирда Ўзбекистон электр энергиясини Туркманистондан, ёзда эса Қирғизистондан импорт қилади.
«Интер РАО ЕЭС» — 1997 йилда ташкил этилган энергетика компанияси. «Интер РАО»нинг дастлабки ихтисослашуви электр энергиясининг халқаро савдоси бўлган.
