Шуҳрат Ризаев Кинематография агентлигига раҳбар этиб тайинланди. Бу ҳақда Миллий кинематографияни ривожлантириш маркази хабар берди.
Шуҳрат Ризаев 1958 йил 10 июлда Тошкент шаҳрида туғилган. Миллий университетнинг филология факультетини тугатган. Маданият ва спорт ишлари вазирлигида, Ойбек музейида, Президент девони ва Вазирлар Маҳкамасида, Давлат ва жамият қурилиши академиясида қатор лавозимларда фаолият юритган.
Бунга қадар у 2017 йилдан буён Кинематография агентлиги директори ўринбосари лавозимида фаолият юритиб келаётганди.
Эслатиб ўтамиз, президентнинг 2021 йил апрелдаги фармони билан «Ўзбеккино» миллий агентлиги Кинематография агентлиги этиб қайта номланган. 2019 йилдан бери агентликни Фирдавс Абдухолиқов бошқариб келаётганди. У 5 июнь куни лавозимидан озод этилди ва Ислом цивилизацияси маркази директори бўлди.
