Россия Украина электр станцияларининг ярмидан кўпини ишдан чиқарди ёки тортиб олди, бу эса 2022 йилнинг февралида босқин бошланганидан бери мамлакат электр таъминотида кенг миқёсдаги узилишларга олиб келди, деб ёзди Британиянинг Financial Times (FT) газетаси.
Нашр Украинанинг номи ошкор этилмаган расмийларига таяниб Украинада электр энергияси ишлаб чиқариш ҳажми Россиянинг ракета ҳужумлари ёки заводларни босиб олиши туфайли 20 ГВт дан пастга тушиб кетганини хабар қилмоқда. Тўлиқ миқёсли уруш бошланишидан олдин кўрсаткич тахминан 55 ГВт эди ва бу Европадаги энг йирикларидан бири бўлган.
FT Украина бош вазири Денис Шмигалнинг сўзларига асосланиб Россиянинг Украина энергетика секторига қилган ҳужумлари оқибатлари «узоқ муддатли» аҳамият касб этади ва энергия тежашкорлиги «келгуси йилларда кундалик ҳаётнинг бир қисмига айланади», деб хабар қилди.
Россиянинг 1 июндаги ҳужуми Украинанинг беш вилоятидаги энергетика объектларига зарба берди, деб ёзди газета. Нашр суҳбатдошларининг сўзларига кўра, иш ташлашлар натижасида Украина 1,2 ГВт ишлаб чиқариш қувватини йўқотган ва ерости омборларидан газни ташиш учун муҳим бўлган инфратузилма жиддий шикастланган. Манбалардан бирининг қайд этишича, қишгача мамлакат аҳолиси куннинг катта қисмини электрсиз ўтказиши мумкин.
Россиянинг 2022−2023 йиллар қиш мавсумидаги бомбардимонлари Украинанинг нисбатан осон таъмирланиши мумкин бўлган электр тақсимлаш тармоғига қаратилган бўлса-да, сўнгги ҳужумлар қайта тиклаш анча қийин ва қимматроқ бўлган иссиқлик ва гидроэлектр станцияларига йўналтирилган, дейилади материалда.
Украина Энергетика вазирлиги FT мақоласига жавобан нашр материалида Россия манфаатлари учун «дезинформация ва ИПМО [информацион-психологик махсус операция — таҳр.] белгилари бор», дея баёнот берди. Вазирликнинг таъкидлашича, газета Украина ҳукуматидаги аноним манбаларга таянади ва «бу тақдим этилган маълумотларнинг ишончлилигига шубҳа туғдиради, чунки у расмий манбалар томонидан тасдиқланмаган».
Вазирлик, шунингдек, FT`ни «материалга ишончлилик бериш» учун «рост ва ёлғон» маълумотларни аралаштиришда айблади. Ташкилот мамлакат энергетика тизимини тиклаш бўйича барча ишлар олиб борилаётганини таъкидлади ва «украиналиклар ёруғлик ва иссиқликка эга бўлади», — деб ваъда берди.
The New York Times газетаси ҳам Украина энергетика тизимининг кескин аҳволи ҳақида мақола эълон қилди. Нашр ҳам эксперт баҳоларига таяниб уруш бошланганидан бери Украина электр энергияси ишлаб чиқариш қувватининг ярмини йўқотганини ёзмоқда. NYT`нинг таъкидлашича, Украина энди қўшни давлатлардан рекорд миқдорда энергия импорт қилишга ва бутун мамлакат бўйлаб режали ўчиришларни жорий этишга мажбур.
