Тармоқларда Самарқанд вилоятида ички ишлар органи ходимининг фуқаролар билан жанжаллашуви ва уларга, хусусан, ҳомиладор аёлга қўл кўтаргани акс этган видео тарқалди.
Унга кўра, ИИБ ходими эркакка камера остида гаплашишини айтиб, уни ўша ерга олиб боришга мажбурламоқчи бўлган. «Биринчи буйруқ бажарилади, кейин муҳокама қилинади», — дея фуқарони калтаклаб кетган у. Воқеага ўша ерда бўлган, қўлида бола кўтарган ҳомиладор аёл ҳам аралашган. Ходим унга ҳам куч ишлатган. Шу пайтда бошқа бир ходими етиб келиб, уларни ажратган.
Вилоят Ички ишлар бошқармаси матбуот хизмати ҳолат 9 июнь куни Самарқанд шаҳрида содир бўлганини маълум қилди. Қайд этилишича, тунги хизматга жалб қилинган профилактика инспектори С.Эшонқулов соат 22:00 атрофида шаҳарнинг Даҳбет кўчасидаги автомобиль йўлининг қатнов қисмида фуқароларнинг жанжал қилаётганини кўрган ва уларни 6-сонли ИИБга олиб борган.
Уларнинг содир этган ҳаракатини расмийлаштириши давомида инспектор ва фуқаролар ўртасида келишмовчилик юзага келган. Жараёнда ИИО ходими икки нафар фуқаро (бири видеода таъкидлаганидек, ҳомиладор аёл)га нисбатан амалдаги қонунчиликка зид равишда жисмоний куч ишлатган, дейилади хабарда.
Ҳолат юзасидан хизмат текшируви ўтказилиб, ходим ички ишлар органлари сафидан бўшатилган. Ҳужжатлар прокуратура органларига юборилган.
