Uzbekistan Airports бошқарув компанияси E-auksion.uz электрон платформасида Тошкент халқаро аэропортининг учиш терминалининг 2024 йилнинг июль ойи охиригача фойдаланишга топшириладиган янги қисмида — «стерил» зонада жойлар ижараси учун учта янги лотни жойлаштирди. Бу ҳақда компания матбуот хизмати хабар қилди.
«Реконструкция ишлари доирасида учиб кетиш залининг чап томонида қурилиш-монтаж ишлари якунланмоқда. Умумий майдони қарийб 3000 квадрат метр бўлган янги кутиш залида учаётган йўловчилар учун кутиш майдони, авиация хавфсизлигига текшириш зонаси ва кенг овқатланиш майдони жойлашади», — дейилади хабарда.
Лойиҳага кўра, умумий майдони 600 квадрат метрдан ортиқ бўлган майдонда турли тоифадаги учта умумий овқатланиш шохобчаси — Европа таомлари ресторани (156 квадрат метр), миллий таомлар ресторани (173 квадрат метр) ва фаст фуд (290 квадрат метр) жойлашади.
«Овқатланиш шохобчаларининг ҳар бир тоифаси учун алоҳида техник шартлар белгиланган. Масалан, тез овқатланиш ресторани учун асосий талаблардан бири таниқли халқаро бренднинг мавжудлиги ҳисобланади. Аэропортда маҳаллий брендлар билан бир қаторда Тошкент аэропортининг хорижлик йўловчиларига таниш ва таниқли халқаро брендлар ҳам бўлиши керак. Қолган иккита тоифага — Европа ва миллий таомлар ресторанлари учун бундай талаблар йўқ. Умуман олганда, барча потенциал ижарачилар озиқ-овқат хизматларини кўрсатишда камида уч йиллик амалий тажрибага эга бўлиши керак. Шаҳарда умумий овқатланиш шохобчалари бўлиши шарт ва Тошкент аэропорти ҳудудида фаолият кўрсатаётган савдо шохобчалари бўлмаслиги керак», — дея тушунтириш беради Uzbekistan Airports нинг ноавиация фаолияти бўйича тижорат бўлими.
Шуни таъкидлаш керакки, ким ошди савдосида иштирок этувчи компаниялар техник топшириқларга тўлиқ риоя қилишлари керак. Ижарачиларга қўйиладиган талаблар ва бошланғич нархлар E-auksion веб-сайтида барча лотлар остида мавжуд. Ким ошди савдоси қоидаларига кўра, дастлабки йиллик суммалар савдо пайтида камида 10 фоизга ошиши мумкин.
