Шавкат Мирзиёев туман ва шаҳарларнинг бош режаларини ишлаб чиқиш бўйича тақдимот билан танишди, деб хабар қилди давлат раҳбари матбуот хизмати.
Бу ҳақда жорий йил 16 январда бўлиб ўтган иқтисодиётдаги устувор вазифаларга бағишланган видеоселектор йиғилишида топшириқ берилган эди. Мутасаддилар шу борада қилинган дастлабки ишлар, мастер режалардан кутилаётган натижалар тўғрисида ахборот берди.
Ўтган вақтда 14 та туман ва шаҳар бўйича мастер режа ишлаб чиқилган. Уларда 759 та кўп қаватли уй-жой, 22 та савдо мажмуаси, 800 дан зиёд хизмат кўрсатиш объекти қуриш имконияти аниқланган.
Шу тарзда 112 та туман ва шаҳардаги драйвер йўналишлар асосида яна 136 та мастер режа тайёрланиши кўзда тутилган.
«Масалан, аҳолиси тез ўсаётган 38 та туман марказлари ва шаҳарларда етарли уй-жойлар қуриш, аҳоли сайр қилиши ва дам олиши учун қулай масканлар ва истироҳат боғлари барпо этиш зарур», — дейилади хабарда.
Туристик салоҳияти юқори 20 та туманда меҳмонхоналарни кўпайтириш, пляж, экологик, тиббиёт, спорт ва экстремал туризмни ривожлантириш орқали сайёҳлар оқимини 2,5 карра ошириш мумкин, дейилади тақдимотда.
Ҳудудидан магистрал йўллар ўтган 68 та туманда 400 дан зиёд мотел, кемпинг, ошхона, дўкон ва автосервислар ташкил этиш мумкинлиги ҳам таъкидланди.
Мастер-режалар асосида бўладиган лойиҳалар ҳисобига 40 мингта иш ўрни яратилиши, бюджетга йилига қўшимча 350 миллиард сўм даромад тушиши кутилмоқда.
Давлат раҳбари қулай инфратузилма, савдо ва кўнгилочар жойлар, юқори даромадли иш ўринлари ташкил қилишни ҳозирдан бошлаш лозимлигини таъкидлади.
Мастер режалар ишлаб чиқилиши ва мониторинги бўйича вертикал тизим яратиш вазифаси қўйилди.
