Американинг етакчи технологик компанияларидан бири ҳисобланувчи Nvidia бозор капиталлашуви бўйича Microsoft`ни ортда қолдириб, дунёдаги энг қиммат компанияга айланди, деб ёзди Reuters.
18 июнь кунги савдо сессияси якунига кўра, Nvidia акциялари қиймати 3,5 фоизга ошиб, 135,58 долларга етди. Шу тариқа компаниянинг бозор қиймати рекорд даражага — 3,335 трлн долларгача кўтарилди.
Шу куни Microsoft акциялари 0,45 фоизга арзонлади ва компания капиталлашуви 3,317 трлн долларгача пасайди. Apple акциялари қиймати эса 1 фоиздан кўпроққа пасайиб, компаниянинг капиталлашуви 3,286 трлн долларгача тушди.
Nvidia ўзининг бозор капиталлашувини атиги тўққиз ой ичида 1 трлн дан 2 трлн долларгача оширишга муваффақ бўлди ва бу кўрсаткичга 2024 йилнинг февралида эришди. Кейинги уч ой ичида эса Nvidia капиталлашуви 2 трлн дан 3 трлн долларгача етди.
Июнь ойи бошида Nvidiaнинг бозор капиталлашуви 3 трлн доллардан ошди, натижада компания дунёдаги энг қиммат компаниялар рўйхатида иккинчи ўринни эгаллади ва бу кўрсаткич бўйича Apple`дан ўзиб кетди.
Reuters`га кўра ўтган йил давомида Nvidia қийматининг тез ўсиши инвесторларнинг сунъий интеллект технологиялари ривожланиши истиқболларига нисбатан оптимизми билан боғлиқ. Nvidia процессорлари ушбу мақсадда ишлатиладиган бозордаги энг яхши процессорлар ҳисобланади ва уларга бўлган талаб таклифдан сезиларли даражада юқори бўлиб турибди.
