Кутилмаган натижалари билан кўпчиликни ҳайрон қолдираётган Евро-2024 турнирининг гуруҳ босқичида иккита тур ортда қолди. Вазият қандай? Бир қарашда, кутилганидек, фаворитлар чиндан ҳам ўз ишини қилмоқда. Аммо ушбу турнирда ҳам кутилмаган натижалар, сюрприз бўлаётган терма жамоалар кўринмоқда. Бугун тунда 3-турга старт берилади. Эътиборингизга эса ўтган икки турнинг қисқача таҳлили ҳамда якунловчи тур олдидан гуруҳлардаги вазият хусусида сўз юритамиз.
«A» гуруҳи
ЖЧ-2018`дан буён ўзига келолмаётган «немис машинаси» ниҳоят ўз уйидаги йирик турнирда барчани қўрқитмоқда. Дастлабки турда Шотландияни тор-мор этган Германия иккинчи турда Венгрияга ҳам мезбон аслида кимлигини кўрсатиб қўйди.
Швейцария ҳам ўз йўналишида давом этмоқда. Плей-офф масаласини ҳал қилиб улгурган Мурат Якин шогирдлари 3-турни мезбон Германияга қарши ўтказади.
Шотландия ҳамда Венгрияда ишлар яхши эмас. Терма жамоалар сўнгги турда ўзаро баҳс олиб бориб, жилла қурса, «энг яхши 3-ўрин» бўлиб чиқиш имконияти учун ҳаракат қилади.
«B» гуруҳи
Турнирдан аввал «ўлим гуруҳи» сифатида қаралган жойда учрашувлар бошқалардан мутлақо фарқ қилмоқда. Мусобақадан аввал экспертлар фаворитлар сафига қўшишда иккиланган Испания терма жамоаси дастлаб Хорватияни йирик ҳисобда (3:0) мағлуб этган бўлса, 2-турда итальянларни минимал ҳисобда (1:0) мағлуб эта олди.
Италия эса аутсайдер сифатида кўрилаётган Албанияни осон юта олмади. Таъкидлаш лозим, Албания барча учун «сюрприз» бўлмоқда. 2-турда Хорватияга қарши ажойиб ўйин кўрсатган терма жамоа ЖЧ-2022`даги Марокашни эслатиб юбормоқда.
Сўнгги йиллардаги халқаро турнирларда барчага бирдек бошоғриқ бўлаётган Хорватияда эса муаммолар бор. Дастлаб йирик ҳисобдаги мағлубият, кейин ютиб турган жойида ғалабани бой бериш… Модрич етакчилигидаги терма жамоа сўнгги турни Италияга қарши ўтказади. Бизни икки қизиқарли учрашув кутиб турибди.
Агарда… Албания Испанияни, Хорватия эса Италияни мағлуб этгудек бўлса, Лучано Спалетти бошчилигидаги терма жамоа 4-ўринда қолиб кетиши мумкин.
«C» гуруҳи
«Энди чемпион бўлиш вақти келди» дея бот-бот такрорланаётган жумлаларнинг барчаси Англияга қаратилган. Жаҳон юлдузларидан иборат жамоа мухлисларига ўзларидан кутилган ўйинларни кўрсатмаяпти. Сербияни 1:0 ҳисобида мағлуб этган Саутгейт шогирдлари иккинчи ўйинда Дания билан дуранг ўйнади.
Дания ва Словенияда эса иккита турдан сўнг очколар иккитадан бўлиб турибди. Ҳатто ҳозирча сўнгги поғонада турган Сербияда ҳам бир очко мавжуд ва улар ҳам плей-офф йўлланмасини қўлга киритиши мумкин.
«D» гуруҳи
Нидерландия ҳамда Францияда 4, Австрияда эса 3 очко мавжуд. Бу гуруҳ хусусида бир нарсани айтиш керак, Левандовский етакчилигидаги Польшадан кўпчилик бундай натижа кутмаганди. Икки ўйинда бирорта ҳам очко ола олмаган, дастлаб ҳисобда олдинга чиқиб, сўнг ўтказиб юбориши оқибатида мағлубиятга учраган терма жамоа турнир билан хайрлашишга улгурди.
Сўнгги турда эса терма жамоалар гуруҳда ким қайси ўринни эгаллаши ва плей-оффда «қайси йўл»га тушишларини аниқлаб олади.
«E» гуруҳи
Таъкидлаш лозимки, сўнгги тур олди энг зўр интрига айни шу гуруҳда қолди. Барча терма жамоада имкониятлар тенг, плей-офф йўлланмасини қўлга киритиш ўзларига боғлиқ. Бельгияни ҳисобга олмаганда, қолган уч терма жамоанинг (Руминия, Словакия, Украина) имконияти деярли бир хил. 26 июнь куни соат 21:00 дан бошлаб икки ажойиб учрашувнинг гувоҳи бўламиз.
«F» гуруҳи
Кутилганидек, Португалия плей-офф йўлланмасини қўлга киритиб улгурди. Туркия, Грузия ҳамда Чехияда имконият ҳамон мавжуд. Ҳа, Грузия Роналду етакчилигидаги терма жамоа билан ўйнашини инобатга олса, уларга анча қийин бўлади. Туркия ҳамда Чехия ўртасида ўтадиган баҳс эса 2- ва 3-ўринни белгилаб бериши мумкин. Кузатамиз.
«Энг яхши 3-ўринлар» рейтинги
Айни ҳолатда қуйидаги терма жамоалар ўз гуруҳларида 3-ўринни эгаллаб турибди. Имкониятлар жиҳатдан Австрия ҳамда Словакия плей-офф йўлланмасини қўлга киритиши кутилмоқда. Аммо тўрт терма жамоа ҳам қараб турмаслиги, ўз имкониятларидан максимал тарзда фойдаланиши аниқ.
Хуллас, бизни 3-турда интрига ва голларга бой учрашувлар кутиб турибди. Натижалар қандай бўлишини эса биргаликда кўрамиз!
Агар сизга гуруҳ босқичи натижалари бўйича «Тактика» жамоаси ва Opta тахминлари ҳамда ўйинлар ўтаётган 10 та стадион ҳақида маълумотлар қизиқ бўлса, қуйидаги ўхшаш хабарлар бўлимидан уларни топишингиз мумкин.
