24 июнь куни Жанубий Кореянинг Хвасон шаҳридаги Aricell литий батареялар заводида ёнғин содир бўлди, бунинг оқибатда камида 22 киши ҳалок бўлди, дея хабар бермоқда Yonhap.
Қайд этилишича, ёнғин маҳаллий вақт билан соат 10:30 атрофида 35 мингга яқин аккумулятор сақланадиган омбордаги батареялар портлаганидан сўнг бошланган. Ҳодиса сабаблари ҳозирча аниқ эмас. Қутқарувчилар ёнғинни 5 соатда ўчирган.
Ҳалок бўлганлар орасида 20 нафар хорижлик бўлиб, уларнинг 18 нафари Хитой ва бир нафари Лаос фуқароси ҳамда фуқаролиги ҳали аниқланмаган яна бир ишчи, деб ёзади Yonhap.
Расмийларнинг айтишича, қурбонлар сони ортиши мумкин ва камида бир киши бедарак йўқолган. Заводнинг яна икки ишчиси жиддий жароҳат олган.
Президент Юн Сок Ёль воқеа жойига ташриф буюрган. Ички ишлар вазири атрофдаги ҳудудларнинг хавфли кимёвий моддалар билан ифлосланишининг олдини олиш чораларини кўришга чақирди, деб ёзади Reuters.
Агентликнинг ёзишича, Aricell компанияси 2020 йилда ташкил этилган бўлиб, сенсорлар ва радиоалоқа қурилмалари учун литий бирламчи аккумуляторларни ишлаб чиқаради. Компаниянинг сўнгги маълумотларига кўра, заводда 48 нафар ходим ишлайди.
