Марказий банк 28 июндан бошлаб хорижий валюталарнинг ўзбек сўмига нисбатан янги қийматини белгилади.
АҚШ доллари курси кунлик савдолар якунида яна 25,11 сўмга арзонлашди. Умуман олганда, долларнинг сўмга нисбатан курси кетма-кет олтинчи савдо кунида (21 июндан бери) пасайиб, деярли 88,75 сўмга — 12643,91 сўмдан 12555,16 сўмга арзонлашди. Бу 13 мартдан бери минимал кўрсаткичдир (12 546 сўм).
Чоршанба куни тижорат банкларида доллар 12 520 сўмдан 12 575 сўмгача курс бўйича қабул қилинди (фақат БРБ, Garant Bank ва Universalbank). Сотиш курси 12 610 сўмдан (Asia Alliance Bank, «Трастбанк» ва «Агробанк») 12 640 сўмгача ўзгарди.
Охирги етти кун ичида (19−27 июнь) валюта айирбошлаш ҳажми 746 миллион долларни (кунига ўртача 106,5 миллион доллар) ташкил этди, бу аввалги беш кунликдагига — 868,4 миллион долларга (ўртача 124 миллион доллар) нисбатан 14 фоизга (122,3 миллион долларга) кам.
Аввал хабар берганимиздек, биринчи чорак якунига кўра, Ўзбекистонда валюта айирбошлаш ҳажми 2,7 фоизга камайиб, 5,82 миллиард долларни ташкил қилган. Кўрсаткич ўтган йилнинг март ойидагига нисбатан 6,8 фоизга пасайган.
Молиячи Отабек Бакировнинг фикрича, валюта савдосининг пасайишига давлат компаниялари учун валюта операцияларини амалга ошириш тартиби устидан назорат, импорт жараёнининг мураккаблашиши ва биржадан ташқари валюта операцияларининг ўсиши сабаб бўлиши мумкин.
«Газета.uz»нинг банк тизимидаги манбаси валюта савдолари ҳажмининг пасайишига ушбу уч омил таъсир кўрсатиши мумкинлигини тасдиқлади. Суҳбатдошнинг қўшимча қилишича, корхоналар ва жисмоний шахслардан чет эл валютасини етказиб бериш (валюта сотиш) ўтган йилнинг мос даврига нисбатан ошган.
Йил бошидан буён сўмнинг долларга нисбатан девальвацияси 1,7 фоизни ташкил этди.
