Тошкентда эркак 11 ёшли қизга жинсий зўравонлик қилишда гумонланмоқда. Бу ҳақда Ижтимоий ҳимоя миллий агентлиги хабар берди.
Қайд этилишича, 31 яшли А.К. расмий никоҳи бекор қилинмаган аёлни ўзига иккинчи хотин қилиб олган ва унинг вояга етмаган 11 ёшли қизини мунтазам зўрлаб келган. Бу билан бир вақтда, ўзининг қонуний хотини ва 5 нафар фарзанди бўлган.
У «рад этиб бўлмас» далиллар билан қўлга олинган. Ҳолат бўйича Жиноят кодексининг 119-моддаси 4-қисми (Жинсий эҳтиёжни зўрлик ишлатиб ғайритабиий усулда 14 ёшга тўлмаган шахсга нисбатан қондириш) билан жиноят иши қўзғатилган. Тошкент шаҳри Ички ишлар бош бошқармаси томонидан терговга қадар текширув олиб борилмоқда.
«Агентлик раҳбариятининг аралашуви билан боланинг ҳуқуқлари поймол бўлиши олди олинди. Ҳозирда жабрланувчига зарур тиббий, психологик ва ижтимоий кўмак кўрсатилмоқда», — дейилади хабарда.
MILITSIYA UZB Telegram канали қўлга олинган А.К. Militsiya tv каналининг (икки канал бир-бири билан боғлиқ эмас) админи эканини айтмоқда. Бу маълумотни «Газета.uz»нинг давлат идораларидаги бир қанча манбалари ҳам тасдиқлади.
