27 июнь куни Жиззах вилоятига ташриф доирасида Шавкат Мирзиёев Хитойнинг BYD компанияси президенти Ван Чуаньфуни қабул қилди, президент компаниянинг Ўзбекистонда «яшил» транспортни ривожлантириш лойиҳасида иштирок этиш режаларини қўллаб-қувватлади, дея хабар бермоқда давлат раҳбари матбуот хизмати.
Қайд этилишича, режалар қўшма инновацион тадқиқот марказини ташкил этиш, кадрлар тайёрлаш, электр транспорти учун техник регламент ва стандартларни ишлаб чиқиш ҳамда Blade авлодига мансуб батареялар ва BYD электробусларини ишлаб чиқаришни ўз ичига олади.
Ўша куни Жиззах вилоятидаги гибрид ва электромобиллар ишлаб чиқарадиган BYD Uzbekistan қўшма заводи конвейердан биринчи электромобил чиқди. Ҳозирда бу ерда 2 та модель — Chazor ва Song Plus Champion ишлаб чиқарилмоқда.
Лойиҳанинг биринчи босқичи доирасида 160 миллион АҚШ доллари миқдорида инвестиция киритилди, 1,2 мингта иш ўрни яратилди. Корхонада пайвандлаш, бўяш ва йиғиш жараёнларини ўз ичига олган юқори технологик ишлаб чиқариш ташкил этилган.
Шавкат Мирзиёев яқин истиқболда моделлар қаторини кенгайтириш ва ишлаб чиқариш қувватини йилига 500 мингтага етказиш зарурлигини таъкидлади.
Томонлар бутловчи ва эҳтиёт қисмларини маҳаллийлаштириш, маҳсулот таннархини камайтириш ҳамда автомобилларни Марказий Осиё ва МДҲ бозорларига экспорт қилиш лойиҳаларини ҳам муҳокама қилди.
