Евро-2024 ўзининг қизғин палласига кириб бормоқда. Бизни олдинда даҳшатли ўйинлар кутиб турибди. Тўғри, гуруҳ босқичи ўта ҳайратланарли бўлмади, аммо етарлича сенсацияларни ҳам кўрдик. Аутсайдер саналган Грузиянинг плей-оффга чиқиши, Хорватиянинг гуруҳда қолиб кетиши, бошқа бир «ўлим гуруҳи»да ҳеч ким кутмаганда Австриянинг пешқадам бўлиши — нимчорак финалда биз учун қизиқарли жуфтликларни белгилаб берди.
Швейцария — Италия (29 июнь, 21:00)
Сўнгги йилларда Евроларда фаворит саналаётган Италия, ҳамиша мусобақаларда ўртамиёна, шу билан бирга, кучли терма жамоаларга бош оғриқ бўладиган Швейцарияга қарши баҳс олиб боради. Икки терма жамоа ўзларидан кутилган ўйинларни кўрсатиб берди, десак янглишмаган бўламиз. Четдан қараганда ўзаро кучлар тенгдек кўриниши мумкин, аммо итальянча футбол ДНКси устун келадими ёки индивидуал маҳоратли футболчилар? Буни биргаликда кузатамиз.
Имкониятлар: 45/55
Германия — Дания (29 июнь, 00:00)
Ҳа, мезбон ҳаддан ташқари кучли эканини кўрдик, ҳис қилдик. Лекин Дания ҳам қараб турмаслиги аниқ. Ўта ёрқин ўйин кўрсатмаган бўлса-да, Эриксен етакчилигидаги терма жамоа «сюрприз» бўлишга интилади.
Юлиан Нагельсман шогирдларининг мақсадлари аниқ. Улар бу йўлдан қайтмаслик учун бор маҳоратларини ишга солишади. Кутилмалар ўта юқори бўлмаса-да, жилла қурса, драматик учрашув кўришимиз мумкин.
Имкониятлар: 65/35
Англия — Словакия (30 июнь, 21:00)
Нафақат четдан қараган, балки ўз мухлисларига ҳам ўйин жиҳатдан ёқмаётган Англия терма жамоаси плей-оффда нисбатан осонроқ йўлга тушди. Рақиб ҳам ўзига қараганда кучли эмас. Бироқ футбол ватани мухлислари ўз суюклиларидан чиройли футбол кутишлари аниқ.
Шу билан бирга, тармоқларда Англиянинг тезроқ турнирни тарк этишини истаётган мухлислар фикрларини ҳам ўқимоқдамиз. Саутгейт супер юлдузлардан иборат терма жамоани гўзал футбол кўрсатишга ундашини кўпчилик кутмоқда.
Имкониятлар: 70/30
Испания — Грузия (30 июнь, 00:00)
Кутганмидингиз? Менимча, йўқ. Испаниянинг рақиби сифатида Чехия ёки Туркия бўлишини тахмин қилган мухлислар адашди. Ҳа, Грузия тарих яратмоқда. Хўш, улар ЖЧ-2022`даги Марокаш ёки Евро-2004`даги Греция бўла олишадими?
Испания эса хотиржамлик билан, ўзининг ёшлари ижросида гуруҳда юз фоизлик натижа қайд этди. Фаворитлар сифатида кўрилган испанлар ўзларидан кутилган ўйинни кўрсатиб берди. Сенсация бўладими, йўқми, билмаймиз, аммо ажойиб тўқнашув бўлиши аниқ. Грузияликлар ўз мухлислари учун борларини майдонда ташлайди.
Имкониятлар: 75/25
Франция — Бельгия (1 июль, 21:00)
Нимчорак финалнинг марказий ўйини, шубҳасиз, ушбу баҳс бўлади. Ўзининг супер юлдузлари билан иштирок этаётган французлар «олтин авлоди» тобора сўниб бораётган Бельгияга қарши ўйнайди. 2018 йилги Жаҳон чемпионатида айни шу терма жамоалар ярим финалда тўқнаш келган ва унда Дешам бошчилигидаги жамоа ғалаба қозонган эди. Евро-2020`да эса Бельгия Италия билан чорак финалда учрашган ва мағлуб бўлган. ЖЧ-2022`да Де Брюйне етакчилигидаги терма жамоа гуруҳдан чиқа олмаган.
Бир қарашда «олтин авлоди» шаклланган юрт вакилларининг катта мусобақаларда омади келмаяпти. «Бу терма жамоа чемпион бўлиши керак» деб кўп бора таъкидланган. Аммо уларда ҳам «Англия синдроми» мавжуддек.
Францияга эса ортиқча таъриф шарт эмас. Улар ҳамиша ўз ишларини профессионал равишда бажаради. Бу сафар қандай бўлади, буни биргаликда кузатамиз.
Имкониятлар: 60/40
Португалия — Словения (1 июль, 00:00)
Рекордлар ўрнатишда ва совринлар ютишда ҳеч қачон ҳафсаласи пир бўлмаган Роналду бу сафар ҳам чемпионликка қаттиқ интилмоқда. Гол ура олмаётганидан дарғазаб бўлиб турган Криштиану плей-оффда катта саҳнага чиқиши мумкин.
Словенияга эса оғир бўлади. Грузиянинг Португалия устидан эришган ғалабасига қараб қолса, хато бўлиши мумкин. Таркиб жиҳатдан ҳам, гуруҳдаги ҳолат жиҳатдан ҳам эркин ва босимсиз ўйнаган португаллар грузинларга имконият беришди, холос. Эндиги учрашув оғир бўлиши аниқ.
Имкониялар: 70/30
Руминия — Нидерландия (2 июнь, 21:00)
Турнир бошида ҳеч ким Руминиянинг ўз гуруҳида 1-ўринни эгаллашини тахмин қилмаган эди. Шу билан бирга, Нидерландия учун ҳам 3-поғона кутилмаган эди. Бизни қизиқарли баҳс кутмоқда. Кучлар тенг деб бўлмайди, аммо жорий Евродаги ўйинлардан келиб чиқиб, шундай деса ҳам бўлади, аслида.
Руминиянинг шиддати, Нидерландиянинг тажрибаси — ким ғолиб бўлишини сешанба оқшомида билиб оламиз.
Имкониятлар: 40/60
Австрия — Туркия (2 июнь, 00:00)
Ишонинг, ушбу баҳс бошқаларига қараганда шиддатлироқ бўлади. Биз бу терма жамоаларнинг гуруҳда қандай ўйнаганларини кўрдик. Ҳатто марказий ўйиндан-да қизиқарли бўлиши кутилмоқда. Кўплаб мутахассислар таъкидлаганидек, плей-оффнинг нисбатан осон йўлидан кетаётган терма жамоаларнинг исталган биридан финалга чиқишини кутиш мумкин. Ва ҳатто мазкур икки терма жамоадан ҳам!
Имкониятлар: 55/45
Материал «Тактика» билан ҳамкорликда тайёрланди.
