Telegram асосчиси Павел Дуров бир неча кун давом этган Ўзбекистонга ташрифи ҳақидаги таассуротлари билан ўртоқлашди. У мамлакатни жуда ёқтиришини ёзди ва саёҳатининг суратлари билан бўлишди.
«Ўзбекистонда Telegram`ни севишади: мамлакатнинг 37 миллион аҳолисининг 70 фоиздан ортиғи Telegram`дан фойдаланади ва уларнинг бутун иқтисодиёти бизнинг платформамиз билан боғланган (мамлакатдаги ҳар бир бизнеснинг Telegram-боти ёки канали мавжуд). Биз бу машҳурликдан фахрланамиз ва бунинг эвазига Ўзбекистонни севамиз», — деди Павел Дуров.
У жадал ривожланаётган Тошкентнинг замонавий инфратузилмаси, Шарқий Ўзбекистоннинг тоғли ландшафтлари, Бухоро ва Самарқанднинг бой тарихидан лол қолганини таъкидлади.
«Кўплаб ёш ва иқтидорли, қалби меҳрибон инсонларни учратдим. Мен самимий қабул учун миннатдорман ва шу йил охирида қуёшли Тошкентда қолишга умид қиламан», — деб ёзади у.
Куни кеча Ўзбекистон президентининг куёви, Марказий Осиё ММА (аралаш яккакурашлар) конфедерацияси раҳбари Отабек Умаров Павел Дуров билан учрашганини маълум қилди.
«Жорий ҳафтада Телеграм жамоаси лойиҳа асосчиси Павел Дуров ва унинг акаси Николай бошчилигида Ўзбекистонга ташриф буюрди. Мамлакатимизда ушбу хизматга алоҳида илиқ муносабат билдирилади, чунки Телеграм биз учун шунчаки биринчи рақамли мессенжердан каттароқ нарсадир. Биз унинг ёрдамида яқинларимиз билан доим алоқада бўлиш билан бирга, янгиликлардан хабардор бўламиз, ишларни юритамиз, керакли товар ва хизматларни топамиз. Телеграм ҳар қандай масалада мобил интернетнинг деярли ҳар бир фойдаланувчисига ёрдам беради», — деб ёзди Telegram саҳифасида.
Фото: @otabek_muhammadalievich / Telegram.
«Биз учун Павел ва унинг яқинларини меҳмондўст Ўзбекистон заминида қабул қилиш ҳақиқий шарафга айланди. Уларнинг барчаси юксак даражадаги ўз ишининг усталари бўлибгина қолмай, балки дунёга қалби очиқ бўлган ажойиб инсонлар эканлигига шахсан ишонч ҳосил қилиш бениҳоя ёқимли ҳиссиётдир. Умид қиламизки, Тошкент, Бухоро ва Самарқанд шаҳарлари қолдирган таассуротлар ҳамда Телеграм фойдаланувчилари билан мулоқот уларга янги технологик ечимларни яратишга илҳом беради. Бунга жуда оз фурсат қолганига ишонаман», — дея қўшимча қилди Отабек Умаров.
Ўзбекистондан олдин Павел Дуров Қирғизистонда бўлган. Сафардан сўнг у бу мамлакатга қайтишга ҳам ваъда берган.
Павел Дуров 10 июнь куни Марказий Осиё мамлакатларига ташриф буюриши ҳақида маълум қилганди. «Мен Марказий Осиёга бориб, у ерда ҳаёт қандай эканини кўришга, одамлар Telegram`дан қандай фойдаланишини ва уларнинг рақамли эҳтиёжларини ўрганишга қарор қилдим», — деб ёзганди у.
Сафар мақсади
«Газета.uz»нинг икки манбаси Павел Дуров Ўзбекистон расмийлари билан Telegram-банк очиш, шунингдек, Toncoin криптовалютасини қонунийлаштириш масаласини муҳокама қилгани ҳақида хабар берди.
Қозоғистонда Павел Дуровнинг Остона халқаро молия марказига (ОХММ) ташрифи чоғида ўзи асос солган Toncoin маъқулланди. Энди валютани ОХММда рўйхатдан ўтган криптобиржаларида сотиш мумкин.
Toncoin — бу The Open Network (TON) блокчейн платформасида яратилган криптовалюта. Дастлаб, лойиҳа Telegram Open Network деб номланган ва Telegram томонидан блокчейн платформаси сифатида ишлаб чиқилган. Эндиликда Toncoin TON тармоғида рақамли актив сифатида ишлатилмоқда.
