АҚШ Олий суди 1 июль куни собиқ президент Дональд Трампнинг даъвоси юзасидан қарор чиқарди. Суд қарорига кўра, собиқ президентлар расмий хатти-ҳаракатлари учун жиноий жавобгарликка тортилмайди, лекин шахсий равишда содир этилган қилмишлари учун бундай эмас, деб хабар бермоқда CNN. Қарор учтага қарши олтита овоз билан қабул қилинди.
Гап Трампнинг 2021 йил январида Капитолийга бостириб киришга алоқадорлиги бўйича иш ҳақида бормоқда. Собиқ президентга тўртта модда, жумладан, давлатни алдаш мақсадида тил бириктириш бўйича айблов қўйилган. Трамп ўзига қўйилган барча айбловларни рад этиб, прокуратурани «жодугар ови» деб атаган. Унинг адвокатлари Колумбия округи Апелляция судига апелляция аризаси топширган ва суд Трампга қарши қарор чиқарганди. Шундан сўнг сиёсатчининг адвокатлари ишни кўриб чиқишга рози бўлган Олий судга мурожаат қилди.
Олий суд мамлакат собиқ раҳбарининг қайси хатти-ҳаракатлари жиноий жавобгарликка тортишдан дахлсизлик билан таъминланади, қайсилари йўқ — қуйи судлар ихтиёрига қолдирди.
Олий суд қарори Капитолийга бостириб кирганлик учун жиноий суд жараёнини йиллар давомида кечиктириши мумкин, деб таъкидлади CNN. Бу, шунингдек, Трамп айбланаётган бошқа ҳолатларга, жумладан 2020 йилги президентлик сайловининг Жоржия штатидаги натижаларини бекор қилишга уринишга ҳам таъсир қилиши мумкин.
Трампнинг ўзи ҳам Олий суд қарорини олқишлади. «Конституциямиз ва демократиямиз учун катта ғалаба. Америкалик эканимдан фахрланаман!» — деб ёзди у Truth Social ижтимоий тармоғида.
