Ҳиндистоннинг Уттар-Прадеш штати Ҳатрас округидаги диний йиғинда юз берган тиқилинчда камида 121 киши ҳалок бўлди, 31 киши жароҳат олди, деб хабар бермоқда Reuters.
Фожиа Пҳулраи Мугҳал Гарҳи қишлоғида содир бўлган, у ерда ўн минглаб одамлар воиз Бҳоле Бабани тинглаш учун тўпланган. Полиция ҳисоботига кўра, рухсат этилган сиғим 80 мингга яқин бўлган бўлса ҳам, йиғинда 250 мингга яқин одам қатнашган.
Шифокорларнинг агентликка айтишича, ўлимларнинг аксариятига бўғилиш сабаб бўлган. Қурбонлар орасида 112 аёл ва етти бола бор.
Reuters ва AP агентликларининг таъкидлашича, оломон кетаётган воизнинг орқасидан югуриб, унга тегинишган. Уларнинг кўпи лойга ботиб, ерга йиқилиб тушган, оқибатда оёқлар остида қолиб кетган.
«Мен аёлларнинг даҳшатли қичқириғини эшитдим, чиқиш жойи яқинидаги ерда жасадлар ётарди. Қўрқиб кетдим, қочдим ва қизимга телефон қила бошладим», — деди жараёнда қатнашганлардан бири Reuters агентлигига. Унинг қизи вафот этган.
Ҳатрас округи бош инспектори Шалаб Матур учрашув ёпиқ чодирда ўтказилганини айтди, деб хабар бермоқда Hindustan Times. «Ҳаммаси ёпиқ бинода содир бўлди ва, афтидан, одамларга ҳаво етмай қолди. Улар имкон қадар тезроқ чиқиб кетишга ҳаракат қилди, бу эса тиқилинчга сабаб бўлди», — деб тушунтирди у.
Полиция, шунингдек, воқеа содир бўлган куни ҳаво жуда иссиқ ва нам бўлганини таъкидлади. Ҳуқуқ-тартибот идоралари ходимлари воқеадан сўнг ғойиб бўлган воизни қидирмоқда.
Бу Ҳиндистондаги диний йиғинда юз берган ва кўп сонли қурбонлари бор биринчи тиқилинч эмас, дея таъкидлайди Reuters. 2005 йилда Вай шаҳридаги Мандхардеви ибодатхонасида 265 дан ортиқ одам ҳалок бўлганди, 2008 йилда эса камида 250 киши Ражастандаги Чамундагар ибодатхонасида тиқилинч қурбони бўлган.
