Беларусь Шанхай ҳамкорлик ташкилотининг (ШҲТ) тўлақонли аъзолигига қабул қилинди, деб хабар бермоқда Беларусь президентининг сайти. Бу ҳақдаги қарор 4 июль куни Остона шаҳрида бўлиб ўтган ШҲТга аъзо давлатлар раҳбарлари кенгашининг Ўзбекистон президенти Шавкат Мирзиёев ҳам иштирок этган йиғилишида имзоланди.
Беларусь ШҲТнинг 10-аъзоси бўлди. Қозоғистон, Қирғизистон, Россия, Тожикистон, Ўзбекистон, Ҳиндистон, Эрон, Хитой ва Покистон ташкилотда бундай мақомга эга.
«Беларусь Республикасининг ШҲТга тўлақонли аъзолиги тўғрисида қарор қабул қилинди. Ҳурматли Александр Григоревич (Лукашенко, Беларус президенти — таҳр.), сизни чин қалбимдан табриклайман. Ишончим комилки, бугунги кун Беларусь тарихида ёрқин саҳифа бўлиб қолади», — деди саммитга раислик қилган Қозоғистон президенти Қосим-Жомарт Тоқаев.
У Беларусь ШҲТ маконида хавфсизликни мустаҳкамлашга ўзининг муҳим ҳиссасини қўшишига ишонч билдирди.
Александр Лукашенко шундай деди: «Муваффақиятли раислик фаолиятингиз учун раҳмат, бу кун Беларусь тарихига мамлакатимиз ШҲТга аъзо бўлган кун сифатида киради».
«Ишончимиз комилки, XXI асрда чинакам ва бўлинмас глобал хавфсизликни барпо этиш зарур. Шу билан бирга, глобал кўпчилик мамлакатлари ташаббусни ўз зиммасига олиши керак, чунки ўзига бино қўйган, худбин Ғарб бунга қодир эмас. У ерда бугун масъулиятли қарорларни мустақил қабул қила оладиган етакчилар йўқ», — деди у.
Беларусь ҳамкорлар учун ушбу энг долзарб соҳадаги ташаббусларини мослаштиришга ҳаракат қилади, деб ишонтирди Александр Лукашенко.
