Рақобатни ривожлантириш ва истеъмолчилар ҳуқуқларини ҳимоя қилиш қўмитаси Ўзбекистонга лифт импорти билан боғлиқ муаммога муносабат билдирди.

Март ойининг охирида тадбиркорлар Ўзбекистонга лифт олиб киришда муаммоларга дуч кела бошлаганди. Маълум бўлишича, импортёрларнинг уч йиллик мувофиқлик сертификатлари ҳукумат топшириғига кўра тўхтатилиб, улар ўз товарларини божхона чегарасидан ўтказа олмай қолган.

Олий Мажлис Сенати июнь ўрталарида сенаторларнинг аралашувидан сўнг муаммо ҳал қилингани ҳақида хабар берган эди. Сенат қўмитаси томонидан ўтказилган дастлабки ўрганишлар натижасига кўра, «Саноат хавфсизлиги» давлат муассасаси республикада саноат маҳсулотини (лифт, эскалатор, газ баллон, иситиш қозонлари) сертификатлаштириш бўйича аккредитациядан ўтган ягона орган ҳисобланади.

"Газета.uz"да реклама

Муассаса аккредитациясининг амал қилиши тўхтатилгани сабабли Ўзбекистон мувофиқликни баҳолаш учун фаолият юритувчи ва аккредитация қилинган сертификатлаш органисиз қолган, бу эса тадбиркорларнинг сарсон бўлишига олиб келган. Маълум бўлишича, божхона омборларида бўлиб турган, 47 корхона томонидан олиб келинган 332 та лифт ва эскалаторларнинг умумий қиймати 9,5 млн долларни ташкил этган.

Рақобат қўмитаси лифт импорт қилувчилар муаммосини ҳал этиш юзасидан Тоғ-кон саноати ва геология вазирлиги ҳамда Вазирлар Маҳкамасига ўз таклифларини киритган:

  • ваколатли орган томонидан бекор қилинган 17 та мувофиқлик сертификатини истисно тариқасида тиклаш;
  • мавжуд бўлган синов лабораторияларининг моддий-техника базасини яхшилаш учун (лифт, лифт ускуналари ва эскалаторларни синовдан ўтказиш учун зарур бўлган синов миноралари ва асбоб-ускуналарни олиб кириш) чет эл грант маблағларини жалб этиш чораларини кўриш;
  • лифтларни синовдан ўтказиш ва мувофиқлик сертификатини бериш бўйича хизматлар бозорига хусусий секторни кенг жалб қилиш чораларини кўриш;
  • сертификатлаш жараёнида бир шартнома доирасида олиб келинаётган марка ва модели бир хил бўлган лифт товарларини фақатгина бир нусхасини синовдан ўтказиш орқали уларга битта мувофиқлик сертификатини расмийлаштириш амалиётини жорий қилиш.