Рақобатни ривожлантириш ва истеъмолчилар ҳуқуқларини ҳимоя қилиш қўмитаси Россиянинг «Лукойл» компанияси шуъба корхонаси бўлган Lukoil Overseas Supply and Trading (Кипр) корхонасига нисбатан иш очди, деб хабар қилди ташкилот матбуот хизмати.
Хусусан, қўмита томонидан компания биржа савдолари орқали техник олтингугурт маҳсулотини реализация қилишда маҳсулот ҳажмларини номувофиқ қўйиш каби манипуляция ҳолатларини содир этгани ва бу маҳсулот нархлари ошишига олиб келгани аломатлари аниқланган. Оқибатда биржа савдоларида техник олтингугурт маҳсулоти нархлари ўртача 10 фоиздан 50 фоизгача ошган.
Компанияга нисбатан «Рақобат тўғрисида»ги қонун ва Вазирлар Маҳкамасининг 2020 йил 18 мартдаги 170-сон қарори билан тасдиқланган низомни бузганлик белгилари билан иш қўзғатилган.
Июнь ойида техник олтингугуртнинг биржа нархи жуда ўзгарувчан бўлганди. Агар 10 июнь куни аукционга қўйилган маҳсулот ҳажми 1435 тонна бўлган ҳолда тоннаси 220,9 минг сўмга сотилган бўлса, 20 июнь куни бир тоннаси 276,6 минг сўмга (ҳажми — 5271 тонна) кўтарилган.
28 июнь куни нарх 52 минг сўмгача пасайган (ҳажми — 20 тонна), кейинги савдо сессиясида эса бир тонна учун 280 минг сўмга (5 минг тонна) ошган.
Lukoil Overseas Supply and Trading LTD 2010 йил апрель ойида бир қатор газ конларининг маҳсулот тақсимоти бўйича келишувларни амалга ошириш жараёнида қўшма маҳсулотларни сотиш учун маркетинг компанияси сифатида ташкил этилган. Ўзбекистонда техник олтингугурт биржа бозорига 2015 йилда кирган. Бугунги кунда компания «Ўзбекнефтгаз» билан биргаликда техник олтингугурт бозорида устунлик қилувчи корхоналар реестрига киритилган.
Техник олтингугурт ўғитлар, пестицидлар, резина буюмлар, фармацевтика, бўёқлар, портловчи моддалар ва бошқа кимёвий маҳсулотлар ишлаб чиқаришда қўлланади. Олтингугурт нефть ва газни қайта ишлашда, қоғоз, тўқимачилик маҳсулотлари ва пластмасса ишлаб чиқаришда ҳам ишлатилади.
