Европа чемпионатининг ҳиссиётларга бой бўлган босқичи бошланмоқда. Чорак финаллар катта эҳтимол билан қайси терма жамоа мутлақ фаворит эканини, таъбир жоиз бўлса, чемпион ва финалчини ҳам аниқлаб бериши мумкин. Тўғри, футбол, айниқса, Евро сенсациялари билан гўзал. Жорий босқичда ҳам буни кузатамизми, йўқми, шу ҳақда сўз юритамиз.
Испания — Германия (5 июль, 21:00)
Чорак финалнинг илк баҳсида Евро-2008 финалчилари иштирокидаги ўйинга гувоҳ бўламиз. Бу икки терма жамоа ўзаро сўнгги марта йирик мусобақада 2022 йилги ЖЧда ўйнаган. Ҳар томонлама ёшарган Испания тажрибали ва юқори классга эга Германиянинг баҳси доимгидан ҳам қизиқ бўлиши аниқ.
Испания нимчорак финалда Грузияни, Германия эса Данияни мағлуб эта олди. Бир қарашда, икки терма жамоа учун ҳам ўйин осон кечмади. Аммо натижалар ғалабанинг қанчалик даражада ишончли қўлга киритилганидан дарак бериб турибди.
Икки терма жамоа бугунга қадар барча мусобақаларда 26 марта ўзаро тўқнаш келган. Шундан 8 тасида Испания, 9 тасида Германия ғолиб бўлган. Яна 9 та ўйинда дуранг натижа қайд этилган.
Имкониятлар: 50/50
Португалия — Франция (5 июль, 00:00)
Ушбу жуфтлик эса Евро-2016`да тўқнаш келган. Таркибдаги футболчиларнинг кўпчилиги ўша вақтда бўлган ва улар жуда яхши эслашади финални. Роналду кўп гол уришни ҳаддан ортиқ истамоқда, балки у мазкур ўйинда мақсадига етар. Катта ўйинларда саҳнага чиқадиган Мбаппе ҳам терма жамоасини оғир вазиятга солиб қўйишларини истамаслиги аниқ. Ҳужумкор ўйин, голлар шоуси кутилаётган ўйин қандай бўлишини кузатамиз.
Нимчорак финалда Португалия ҳар қанча қийналмасин, рақиб нисбатан кучсизроқ терма жамоа эди. Франция эса Бельгияни сўнгги дақиқаларда урилган гол эвазига мағлуб этди.
Икки терма жамоа Европа чемпионатлари тарихида ўзаро 4 марта тўқнаш келган. Шундан 2 тасида Франция ғалаба қозонган, яна бирида дуранг ва бир учрашувда Португалия ғалаба қозонган. Роналду етакчилигидаги жамоанинг ягона ғалабаси ёдингиздами?!
Имкониятлар: 49/51
Англия — Швейцария (6 июль, 21:00)
Нимчорак финалдан аввалги кутилмаларда ушбу босқичда Евро-2020 финалчилари ўйнаши керак эди. Аммо, лекин, бироқ Швейцариянинг ўйини кўпчиликни қўрқитиб қўйгани аниқ. Ҳатто Саутгейт бошчилигидаги терма жамоа ва мухлислари ҳам рақибга ўта жиддий муносабатда бўлмоқда. Ушбу баҳс ҳам супер даражада ўтиши натижани олдиндан тахмин қилиш қийинлиги ва шунчаки Англиядаги номлар унга бўлган ишончни ошириши — интригани кучайтирмоқда.
Икки терма жамоа ўртасида ўтказилган жами 31 та ўйиннинг 22 тасида Англия термаси устун келган. Яна 6 та учрашув дуранг билан якун топган, 3 тасида эса Швейцария ғалаба қозонган.
Имкониятлар: 55/45
Нидерландия — Туркия (6 июль, 00:00)
Хўш, сиз ҳам Австрияни кутганмидингиз? Туркия турнирнинг мутлақ «сюрприз» терма жамоаси бўлаётгани аниқ. Ҳали бу ерда Нидерландияни фаворит дейишга эрта. Туркиянинг «сюрприз»лари тугамагани аниқ. Нимчорак финалда икки терма жамоа ҳам ажойиб ўйин кўрсата олди. Энди эса янада қизғин, муросасиз ва ҳужумкор ўйин бўлиши аниқ.
Юқоридаги учта ўйинда ҳар қанча номлар таниқли бўлмасин, мутлақо эҳтиёткор ўйин кўришимиз ҳам мумкин. Сабаби энди терма жамоаларга ўйиндан ҳам кўра натижа муҳим. Нидерландия ва Туркия эса ҳамиша ўз ўйинини чиройли кўрсатиб келади.
Бу икки терма жамоа Европа чемпионатларининг якуний босқичида илк бор ўзаро ўйин ўтказади. Бунга қадар Жаҳон ва Европа чемпионатлари саралаш учрашувларида баҳс юритишган. Жами ўтказилган 14 та ўйиннинг 6 тасида Нидерландия, 4 тасида Туркия ғалаба қозонган. Қолган 4 та учрашув дуранг билан тугаган.
Имкониятлар: 60/40
Материал «Тактика» билан ҳамкорликда тайёрланди.
