АҚШ президенти Жо Байден Дональд Трамп билан фалокатли дебатдан сўнг ўз номзодини қайтариб олиш ва президентлик пойгасини тарк этиш нияти йўқлигини айтди, деб хабар бермоқда CNN.
«Иложи борича аниқ, содда ва тушунарли қилиб айтай: мен югуряпман. Мен Демократик партиядан номзодман. Ҳеч ким мени ташқарига итариб юбормаяпти. Мен кетмаяпман. Мен бу пойгада охиригача қатнашаман ва биз ғалаба қозонамиз», — деди Байден ўзининг бутун сайловолди штаби билан конференция суҳбатида. У «сўнгги бир неча кун оғир бўлганини» тан олди.
Учрашувда Байден номзодини қўймасликка қарор қилса, унинг ўрнига келиши мумкин бўлган вице-президент Камала Ҳаррис ҳам иштирок этди.
Бир кун олдин Байден ва Ҳаррис 24 демократ губернатор билан виртуал ва шахсан учрашиб, уларни қайта сайланишга тайёр эканига ишонтирган. Ўша учрашувдан сўнг Нью-Йорк, Миннесота ва Мэриленд губернаторлари ОАВ билан гаплашиб, Байденни қўллаб-қувватлашда давом этишларини айтган.
Аввалроқ New York Times манбаларига таяниб, Байден яқин кунларда жамоатчилик фикрини ўзгартира олмаса, номзодини қайтариб олиш тўғрисида ўйлаётгани ҳақида хабар берган эди. Оқ уй бу даъвони «мутлақо ёлғон» деб атади.
CNN манбаларига таяниб, Байден оиласи, жумладан, биринчи хоним Жилл Байден унинг сайловда иштирок этиш қарорини тўлиқ қўллаб-қувватлашини ёзмоқда. Байденнинг собиқ ёрдамчисига кўра, президент ва унинг рафиқаси муҳим қарорларни биргаликда маслаҳатлашмасдан қабул қилмайди.
- Байден ва Трамп ўртасидаги илк сайловолди дебати 27 июнь куни Жоржия штатининг Атланта шаҳридаги CNN студиясида бўлиб ўтди. Телеканал томошабинларининг 67 фоизи республикачи, 33 фоизи эса демократ ғалаба қозонганига ишонган. Кўпинча дудуқланиб гапирадиган 81 ёшли Байденнинг омадсиз чиқиши Демократик партияда ваҳима ва унинг ёшини ҳисобга олган ҳолда, номзод бўлиши керакми, деган тахминларни келтириб чиқарди. Айрим донорлар ва демократ қонунчилар очиқчасига президентни пойгадан чиқишга чақирди.
- Дебатдан сўнг АҚШ ОАВда ўтказилган сўнгги сўровномалар Трампнинг Байдендан олдинда эканини кўрсатди. Масалан, New York Times сўровига кўра, Трамп 49 фоиз билан 43 фоизли Байдендан олдинда.
