Франциядаги парламент сайловларининг иккинчи босқичи натижаларига кўра, биринчи ўринни Миллий ассамблеядаги 182 ўринни қўлга киритган «Янги халқ фронти» (NFP) сўл партиялари коалицияси эгаллади, деб ёзмоқда Le Monde нашри мамлакат Ички ишлар вазирлиги маълумотларига таяниб.
Президент Эммануэль Макроннинг марказчи «Биргаликда» коалицияси 168 ўрин билан иккинчи ўринни эгаллади.
Учинчи ўринда Марин Ле Пеннинг «Миллий бирлашув» (143 ўрин) бошчилигидаги ўта ўнг партиялар коалицияси жойлашган.
Франция парламентидан жами 577 депутат жой олади. Шундай қилиб, ҳеч бир блок мутлақ кўпчилик овозни (289 ўрин) ололмади. Бу мамлакат тарихида «мисли кўрилмаган ҳолат», деб таъкидлади Le Monde.
Сайловнинг иккинчи босқичида 501 мандат, биринчисида 76 мандат тақсимланди.
30 июнь куни бўлиб ўтган биринчи турда 37 номзодни ўз ичига олган «Миллий бирлашув» ғалаба қозонганди. Кейинги ўринда NFP коалицияси (32 ўрин), учинчи ўринда эса президентнинг «Биргаликда» (2 та ўрин) партияси эди.
Франция бош вазири Габриэль Атталь президентга истеъфога чиқиш ҳақидаги аризасини топширишини, бироқ сайловлардан кейин юзага келган сиёсий ноаниқлик нуқтаи назаридан хизматда давом этишини маълум қилди.
- Президент Эммануэль Макрон Миллий ассамблея (парламент қуйи палатаси) тарқатиб юборилганини ва 9 июнь куни Францияда бўлиб ўтган Европарламент сайловларида «Миллий бирлашув» ғалаба қозонганидан кейин муддатидан олдин сайловлар ўтказилишини эълон қилганди.
