2024−2025 ўқув йилида олий ва профессионал таълим муассасаларига кириш учун онлайн рўйхатдан ўтган абитуриентларга «Абитуриент рухсатномаси»ни бериш бошланди, дея хабар бермоқда Билимларни баҳолаш агентлиги.
Абитуриентлар тест синовларида иштирок этиш учун рухсатномани my.uzbmb.uz сайтига шахсий идентификация рақами ҳамда паспорт серияси ва рақамини киритган ҳолда олишлари мумкин.
Агентлик тест синовига паспорт (ID-карта) ва рухсатнома билан белгиланган вақтдан кечикмаган ҳолда келиш лозимлигини эслатди. Паспорт нусхаси ёки бошқа ҳужжатлар билан келган, шунингдек, кечикиб келган абитуриентлар тест синовларига киритилмайди.
Маълумот ўрнида, 2024 йил олий ва профессионал таълим муассасаларига ўқишга кириш учун ҳужжат топширган 894 279 нафар абитуриентнинг 805 688 нафари тестда қатнашади. 88 591 кишининг топширган ҳужжати турли сабаблар билан қабул қилинмаган. Имтиҳон олиш учун 73 та ёпиқ турдаги катта сиғимли бино тайёрланмоқда.
Кириш тест синовлари 14 июлдан 28 июлга қадар ўтказилиши режалаштирилган. Имтиҳонлар 28 июлда якунланади ҳамда 30 июлдан бошлаб 15 кун йўналиш танлаш имконияти яратилади. 13 августда (шу куни ҳам танлаш мумкин бўлади) ушбу муддат якунланади. 7 кунлик муддатдан сўнг мандат ҳисобланади ҳамда 21−22 августда эълон қилиниши режалаштирилган.
Аввалроқ «Газета.uz» тизимдаги ўзгаришлар бўйича Олий таълим, фан ва инновациялар вазирлиги Таълим сифатини назорат қилиш бошқармаси бошлиғи Абдусамат Маманазаров билан суҳбатлашганди.
