8 июль куни кундузи Тошкент шаҳридаги Ибн Сино номидаги 1-сонли шаҳар клиник шифохонаси биносининг тагидаги тўсинга дарз кетиб, кўчиб тушди. Шифохона бош шифокори Содиқ Алимов ҳолат юзасидан изоҳ берди. У девордаги бетон конструкциялар вақт ўтган сари эгилиб келаётганини, зарарланиш фақат битта балконда бўлганини айтди.
Унинг сўзларига кўра, 1979 йилда қурилган бино 2018−2019 йилларда реконструкция қилинган. Уни аҳволи ёмон эмас, қониқарли. Бугунги кунда унда 118 нафар бемор бор. 5 қаватли бинонинг 2-қавати балкони тагидаги тўсинга дарз кетганини кўришгач, ФВВ ходимларига маълумот берилган.
Фото: Kun.uz
«ФВВ ходимлари кеча келиб, ҳаммаёқни текширишди. Улар экспертлар чақирилиб, хулоса олиниши кераклиги тўғрисида хулоса беришди. Келгунча бинонинг шу тарафидаги беморларнинг бир қисми нариги тарафга кўчирилди. Бирорта бемор шифохонадан чиқиб кетгани йўқ. „Оғирсаноатлойиҳа“ ташкилотининг мутахассислари бинони текшириб чиқди. Натижада бинонинг зарарланиши локал характерга эга экани, яъни битта балконга тааллуқли экани, балконнинг конструкцияларини олиб ташлаш кераклиги тўғрисида хулоса беришди», — дея қўшимча қилди Содиқ Алимов.
Эртаси куни — 9 июлда бинога қурувчилар чақирилган. «Бетон конструкциялар вақт ўтган сари эгилиб келаётганди. Уни зарар келтирмаслиги учун тушириб юбордик. Бинога зарар етган жойи йўқ. тўлиқ функциясини бажариб турибди», — деди шифохона бош шифокори.
