Саноқли соатлардан сўнг ярим финал ўйинлари бошланади. Терма жамоаларнинг бугунгача ушбу Еврода босиб ўтган йўли ҳақида биламиз. Улар ушбу учрашувларда қандай иштирок этади, бу эса кўпчиликка қизиқ. «Тактика» жамоаси ярим финал ўйинлари олди тахминлари билан бўлишади. Тайёрмисиз, унда бошладик.
Испания — Франция (9 июль, 23:59)
Икки терма жамоа учун ҳам чорак финал осон ўтмади. Бири ўта қийин рақиб ҳисобланган Германияни қўшимча вақтларда аранг енгган бўлса, яна бири Португалия билан пенальтилар сериясига қадар етиб борди. Иккиси ҳақида ҳам қизиқ гап пайдо бўлди: Испаниянинг немисларга қарши учрашувида рақиб терма жамоанинг кўплаб футболчилари асабийлашгани, шу билан бирга, ўйини очилмагани учун «омади» келганини айтишди. Франция эса турнир давомида урадиган голлари ўзиники эмаслигида «айбланмоқда».
Терма жамоалар ўз тарихларида 36 бор тўқнаш келишган. Уларнинг 13 тасида Франция, 16 тасида Испания ғалаба қозонган. Яна 7 та учрашув дуранг билан тугаган.
Хўш, бугун ким аслида кимлигини билиб оламизми? Бизнингча, йўқ. Сабаби испанлардан уч нафар футболчи — Карвахаль, Ле Норман (иккисида ҳам сариқ карточкалар кўпайиб кетгани сабаб), Педри (жароҳат) ушбу баҳсда иштирок этмайди. Французларда таркиб жиҳатдан муаммо йўқ бўлса-да, юқорида таъкидланганидек, гол уришда муаммолар мавжуд.
Очиқ футбол жиҳатидан испанлар ўзини яхши томонлама кўрсатмоқда. Улар Германиядан ҳам кўп томонлама устунликка эга бўлишди. Аммо Франция… Португалия ҳужумларни қалаштириб ташлади, Дешам шогирдларида эса бу борада ҳолат мақтангулик эмас. Бироқ барибир исталган ҳимоячининг кўнглига ғулғула солувчи жиҳат бор — Килиан Мбаппе! Исталган вақтда катта саҳнага чиқиши мумкин бўлган «Реал» футболчиси билан Алваро Моратани солиштириш қийин.
Бугунги ўйин учун тахминий таркиблар:
- Испания: Унай Симон; Навас, Начо, Ляпорт, Кукурелья; Ольмо, Родри, Фабиан Руис; Ямаль, Мората, Уильямс.
- Франция: Меньян; Кунде, Салиба, Упамекано, Эрнандес; Канте, Чуамени, Камавинга, Гризманн; Коло-Муани, Мбаппе.
Имкониятлар: 50/50
Нидерландия — Англия (10 июль, 23:59)
Нидерландиянинг қувноқ футболи, ишонамизки, англияликларни ҳам илҳомлантириб юборади. Натижа учун ўйнаш, финалга амаллаб чиқиб олиш учун ўйнаш айни шу баҳсда бўлмаса керак. Юқоридаги супер қарама-қаршилик олдида бу учрашув зерикарлидек туйилиши мумкин, лекин тескариси бўлса ажаб эмас. Куман ҳам, Саутгейт ҳам чиройли футбол орқали натижага интилади. Шу билан бирга, мавжуд «карта»ларни очиб ташламаган ҳолда.
Ўзаро ўтказилган 32 та баҳснинг 9 тасида нидерландияликлар, 13 тасида англияликлар ғалаба қозонган. 10 та баҳс эса дуранг билан якун топган.
Икки терма жамоанинг чорак финалдаги ўйини ҳақида нима дейиш мумкин? Нидерландия матонатли Туркияга қарши зўр қаршилик кўрсатди ва юта олди ўйинни. Англия эса Швейцарияга қарши ўйинда қийналди, лекин гол ўтказиб юборгач, 5 дақиқа ичида ўзини тиклай олди. Кўрдик, билдик, ҳис қилдик.
Иккала терма жамоада ҳам ҳеч қандай йўқотиш йўқ. Мутлақ оптимал таркиб ва ўйинни кўрсата билишса, ярим финалнинг «гул»ини кўришимиз мумкин.
Эртанги ўйин учун тахминий таркиблар:
- Англия: Пикфорд; Уокер, Стоунз, Гехи; Сака, Мейну, Райс, Шоу; Фоден, Беллингем; Кейн
- Нидерландия: Вербрюгген; Думфрис, де Врей, ван Дейк, Аке; Схаутен, Симонс, Рейндерс; Мален, Депай, Гакпо
Имкониятлар: 49/51
Ёқимли футбол тилаймиз!
