Тошкентнинг Марказий (Шимолий) вокзалига келадиган ва жўнайдиган деярли барча йўловчи поездлари 15 июлдан 15 августгача Жанубий вокзал орқали ҳаракатланади. Бу ҳақда «Ўзтемирйўлйўловчи» компанияси матбуот хизмати хабар берди.
Бу «Тўқимачи» ва «Тошкент-Йўловчи» (Марказий вокзал) бекатлари оралиғидаги йўлларда олиб борилаётган таъмирлаш ишлари билан боғлиқ.
Ой давомида Afrosiyob тезюрар поездлари, «Шарқ», «Насаф», «Тошкент — Андижон», «Тошкент — Волгоград», «Душанбе — Тошкент» поездлари қатнови Жанубий вокзалдан амалга оширилади.
Марказий вокзал томонидан қабул қилинадиган «Олмаота — Тошкент — Олмаота», «Тошкент — Новосибирск — Тошкент», «Тошкент — Самара — Тошкент» ва «Тошкент — Хўжакент — Тошкент» йўналишлари бундан мустасно бўлади.
Ҳар иккала вокзалдаги чипта кассалари, шунингдек, Жанубий вокзалдаги учта хавфсизлик назорат пункти кунига 24 соат ишлайди.
Марказий вокзалга билмаган ҳолда етиб келган йўловчилар учун Жанубийсигача бепул автобуслар қатнайди.
Хабарда айтилишича, Afrosiyob, «Шарқ», «Насаф», «Тошкент — Андижон», «Тошкент — Волгоград» ва «Душанбе — Тошкент» рейслари бўйича олиб борилаётган ишлар якунланганидан кейин йўловчи поездларининг қатновига рухсат бериш учун аввал тўхтаб туришга мажбур бўлган юк поездлари тўхтовсиз ҳаракатланиши мумкин бўлади.
