Президент Шавкат Мирзиёев 9 июль куни геология соҳасидаги ишлар ва инвестиция лойиҳалари ижроси билан танишди, дея хабар қилди давлат раҳбарининг матбуот хизмати.
Ўтган 6 ойда қарийб 3 миллион тонна кўмир қазиб олинган. «Шарғункўмир» акциядорлик жамиятида механизациялашган ерости комплекслари тўлиқ ишга туширилиб, кўмир қазиб чиқариш бир кеча-кундузда 3,5 минг тоннага етказилган (Хитой билан ҳамкорликда модернизация қилинмоқда), дейилади хабарда.
Иккинчи ярим йилликда яна 5 млн тоннадан зиёд кўмир қазиб олиниши режалаштирилган. Шундан 1,8 млн тонна иссиқлик электр станцияларига, 1 млн тоннадан ортиғи аҳолига, 540 минг тонна ижтимоий муассасаларга етказиб берилади, 1,8 млн тонна маҳаллий кўмир биржа савдоларига чиқарилади.
Умуман, бу йил кўмир қазиб чиқариш ўтган йилга нисбатан 1,4 млн тоннага кўп бўлиши кутилмоқда, импорт ҳажми (2023 йилда 1,7 бараварга ўсиб, 204,4 млн долларни ташкил этган) сезиларли даражада қисқаради.
Хитойнинг Henan компанияси Тошкент вилоятининг Оҳангарон туманидаги Нишбош конини ўзлаштириш учун 400 млн доллар миқдорида тўғридан-тўғри инвестиция йўналтиришни режалаштирмоқда. Бу лойиҳа самарасида ерости усулида йилига 8 млн тоннагача кўмир қазиб чиқариш ва шундан 5 млн тоннасини бойитиш режалаштирилган. Henan — бу кўмир қазиб олиш ва кимё саноатига ихтисослашган йирик давлат компанияси.
Ўзбекистонда каолиннинг (оқ лой, ундан чинни, сопол идишлар, қоғоз ишлаб чиқаришда хомашё сифатида фойдаланилади) ҳам катта захираси мавжуд. Ҳозирда конларни ўзлаштиришга жалб қилинган тадбиркорлар томонидан 396 минг тонна маҳсулот қазиб олинмоқда. Бу эса жуда кам, дейилади хабарда.
Шу боис 2024—2025 йилларда Геология дастури доирасида 7 та кон ташаббускорларга таклиф этилади ва бу орқали қазиб олиш ҳажми 2 миллион 700 минг тоннага етказиш кутилмоқда.
Тоғ-кон саноати ва геология вазири Бобир Исламов.
Туркиянинг Bab Energy ve Petrol Urunleri A.S компанияси билан биргаликда Тошкент вилоятидаги «Апартак-3» кони негизида бойитилган каолин ишлаб чиқариш ҳам режалаштирилмоқда. Бунинг натижасида 40 та янги иш ўрни яратилиб, йилига 70 минг тонна бойитилган каолин олинади, дейилади хабарда.
Президентга Хитой билан ҳамкорликдаги умумий қиймати 800 млн долларлик лойиҳаларнинг бориши ҳақида ҳам ахборот берилди.
