Вазирлар Маҳкамаси 3 июль куни давлат хизматлари кўрсатиш тизимини соддалаштириш ва бюрократик тўсиқларни қисқартириш бўйича қарор қабул қилди.
Бугунги кунда болаларни давлат мактабгача таълим ташкилотига (МТМ, боғча) қабул қилиш учун йўлланмалар ахборот тизими орқали берилади ва юборилади.
Йўлланма берилганда фуқаролар тасдиқлаш коди билан билдиришнома оладилар, унинг асосида бола мактабгача таълим муассасасига қабул қилинади.
Илгари тизимда муаммолар юзага келган тақдирда, йўлланма шакллантирилмай қолган ва бола боғчага қабул қилинмаган. Эндиликда Адлия вазирлиги ташаббуси билан киритилган ўзгартиришларга кўра, давлат ташкилотларининг айби билан боғчага қабул қилиш кечиктирилса, йўлланма ўз кучида қолади.
Шунингдек, фуқаролар ўз телефон рақамларини исталган вақтда йўлланма бланкасида ўзгартиришлари мумкин бўлади. Бунинг учун аризачи Давлат хизматлари марказига мурожаат қилиши ёки ЯИДХП веб-сайтига кириши, сўнгра янги рақамга юбориладиган кодни киритиши керак.
Болани боғчага қабул қилиш тартиби билан бу ерда танишишингиз мумкин. ЯИДХП (my.gov.uz) орқали боғчага қабул қилиш учун ариза топшириш мумкин.
