Термиз халқаро аэропортида аэродром мажмуасини реконструкция қилишнинг охирги — учинчи босқичи якунланди, деб хабар бермоқда Uzbekistan Airports матбуот хизмати.
Ушбу босқичдаги ишлар аэропорт фаолиятини чекламаган ҳолда амалга оширилди, унинг доирасида иккинчи (РД-А) ва асосий юриш йўлаги участкаси қурилиши якунланди.
Ҳар бир юриш йўлагининг таянч қисми кенглиги 23 м, умумий эни эса 44 м, бу Boeing787/777, Airbus 330 каби кенг фюзеляжли самолётларга чекловларсиз юриш имконини беради. Шунингдек, перронда учта самолётлар турар жойларини қуриш ва ёритиш мосламаларини ўрнатиш ишлари якунига етди.
«Реконструкция учун материал сифатида учиш-қўниш йўлагидаги каби цемент-бетон ишлатилган. Бу Сурхондарё вилоятининг иссиқ иқлимида оптимал ечим бўлиб, учиш-қўниш йўлаги янада мустаҳкам ва бардошлироқ бўлади», — дейилади хабарда.
Эслатиб ўтамиз, 2020 йил охирида бошланган реконструкциянинг иккинчи босқичи 2022 йил декабрида (55 кунлик танаффусдан сўнг) якунланган.
Ўшанда 4E тоифали аэродром мажмуасининг катта қисми, жумладан, узунлиги 3000 метр ва эни 60 метр бўлган янги учиш-қўниш йўлаги, юриш йўлаклари ва учта самолёт турар жойи бўлган перрон қурилган, шунингдек, аэродром замонавий CAT-I ICAO ёритиш тизими, метеорологик ва радионавигация қўниш тизимлари билан жиҳозланганди.
Аэропорт терминали 2019 йилда реконструкция қилинган ва фойдаланишга топширилганди.
Термиз аэропорти аэродром мажмуасини охирги марта реконструкция қилиш 1989 йилда амалга оширилган.
