Украина 2024 йил ноябрида бўлиб ўтадиган АҚШ президентлигига сайловлар олдидан иккинчи тинчлик саммитини ўтказмоқчи, деб хабар бермоқда Bloomberg нашри манбаларга таяниб. Бу сафар Украина томони Россияни иштирок этишга таклиф қилмоқчи.
Агентликнинг қайд этишича, бундай шошилинч қарор Дональд Трампнинг Оқ уйга қайтиши ҳақидаги хавотирлар билан боғлиқ. Президентликка бўлажак номзод инаугурациясидан олдин ҳам Украинадаги урушни тўхтатишини бир неча бор таъкидлаган, шунингдек, Киевга давом этаётган ҳарбий ёрдамга қарши чиққан.
Трампнинг режаси нимадан иборат бўлиши мумкин?
Июнь ойи охирида Reuters агентлиги Трампнинг маслаҳатчилари унга Украина ва Россия музокараларни бошлашга мажбур бўлиши, Киевни қурол-яроғ етказиб беришни тўхтатиш, Москва эса уларни кўпайтириш билан таҳдид қилиш режасини тақдим этганини ёзганди. Трамп режага ижобий жавоб берган, дейди маслаҳатчилар. Музокаралар вақтида сулҳ амалдаги чизиқлар бўйлаб бўлади.
Politico, шунингдек, Трамп Россия президенти Владимир Путинга ён бермоқчи экани, Киевни ўз ҳудудларининг бир қисмини Москвага беришга ва НАТОнинг шарққа кенгайишидан воз кечишга мажбурлашини ёзган.
Bloomberg`нинг Ғарб мамлакатларидаги дипломатик манбаларининг таъкидлашича, ҳар қандай саммит «аниқ мақсад» ва «натижанинг аниқ кутилмалари»га эга бўлган тақдирдагина ўтказилиши мумкин. Шу билан бирга, баъзи америкалик расмийлар Россия иштирокидаги бундай тадбир яқин келажакда ўтказилиши мумкинлигига шубҳа билдирди.
Россия Ташқи ишлар вазирлиги янги тинчлик саммитида иштирок этишдан бош тортиб улгурди. Вазирлик вакилининг таъкидлашича, Россия расмийлари бунда «Зеленский формуласи»ни — мутлақо боши берк ва ультиматив бўлган аввалги риторикани эшитмоқда, шунингдек, «Украина инқирозини ҳал қилиш бўйича бошқа ташаббусларга атайлаб эътибор бермаслик»ни кўрмоқда.
- 15−16 июнь кунлари Швейцарияда Украина бўйича биринчи тинчлик саммити Россия иштирокисиз бўлиб ўтди. Унда 90 дан ортиқ давлат ва саккизта халқаро ташкилот вакиллари иштирок этди. Россиянинг асосий ҳамкори Хитой тадбирда иштирок этишдан бош тортди.
- Саммитда Украина президенти Владимир Зеленский томонидан таклиф этилган «тинчлик формуласи»нинг 10 бандидан учтаси: ядровий ва озиқ-овқат хавфсизлиги, барча ҳарбий асирларни алмашиш ва депортация қилинган украиналик болаларни қайтариш масалалари муҳокама қилинди.
