Ўзбекистон Олий Мажлиси Қонунчилик палатаси спикерининг икки ўринбосари оғир жиноятлар учун ўлим жазосини қайтариш бўйича қарама-қарши фикрлар билдирди. Уларнинг баёнотлари Тошкентда бир эркак ўзи билан бирга яшовчи аёлнинг 3 ёшли боласини ўлдиргани ҳақидаги хабардан кейин янгради.
Ўзбекистон «Миллий тикланиш» демократик партияси фракцияси раҳбари Алишер Қодиров «Мурғак болага ваҳшийлик қилган инсон яшамаслиги керак», — деб ёзди.
У бир йигит 20 марта пичоқланган яна бир воқеани эслади. Суд 25 ёшли қотилни 17 йилга озодликдан маҳрум қилган.
«25 ёшли бу махлуқ қамоқдан 42 ёшида жамиятга ким бўлиб қайтади? Ҳайвонлашиб кетган жиноятчининг солиқларимиз ҳисобига соғлиғини сақлаб, қорнини тўйдириб, бошқа инсон бўлиб қолишини кутиб ўтириш мантиқсиз!» — деди депутат.
«Бундайлардан жамиятни тозалаш керак! Болалар ва бегуноҳ аҳоли қирғинига юзсизларча кўз юмиб, дунёга инсонпарварликдан дарс бераётганларнинг инсонқарашига мослашишга мажбурмизми?» — дея сўради у.
Партия раҳбари, шунингдек, бундай жиноятларни содир этган «махлуқлар» келажакдаги «про-махлуқлар»га ўрнак бўлади, деган фикрни ҳам билдирди.
Спикернинг Қонунчилик палатасида ахборот фаолиятини мувофиқлаштириш ва оммавий ахборот воситалари билан ҳамкорлик масалалари бўйича ўринбосари Одилжон Тожиев бу фикрга қўшилмаслигини билдирди.
Унинг фикрича, гўдакнинг умрига зомин бўлган кимсаларнинг яшашга ҳаққи йўқ, дея билдирилган иддао «ўлим жазосини тиклаш керак» дегандек гап.
«Бир қарашда адолатли ва мақбул ечимдек кўринадиган ушбу таклифга мутлақо қўшилмайман», — деди у.
Биринчидан, ўлим жазоси эҳтимолий нохолис ўтказилган тергов ёки нотўғри чиқарилган ҳукм таъсирида жазоланган бегуноҳ инсоннинг ҳаёти бутунлай йўқотилишига олиб келиши мумкин, деди депутат.
«Тарих — тирик гувоҳ. Суд қарори қанчалик адолатли кўринмасин, йиллар ўтиб жиноятчи аслида умуман бошқа шахс бўлганли аниқланган кейслар жуда кўп», — деб ёзади вице-спикер.
Иккинчидан, ўлим жазоси жиноятчилик даражасига таъсир кўрсатмайди, дейди у.
Жиноятлардан тийиб турадиган самарали воситалардан бири жазонинг шафқатсизлигида эмас, муқаррарлигида намоён бўлади, — дейди Одилжон Тожиев.
«Қолаверса, ўзга бир инсоннинг умрига нуқта қўйишга сабабчи бўлган қотилга ўлим жазосини берсак, ўша ваҳший кимсадан фарқимиз қолмайди», — деб ёзди у.
«Давлат ўзи бермаган ҳаётни олишга ҳаққи йўқ, деб ўйлайман. Яшаш — табиий ҳуқуқ!» — деган депутат ўлим жазосини тиклаш керак деганларга Конституция китобини совға қилиш кераклигини қўшимча қилди.
