11 июль куни БМТ Бош ассамблеяси Украинадаги атом иншоотлари, жумладан, Запорожье атом электр станциясининг (ЗАЭС) техник ва жисмоний хавфсизлиги тўғрисидаги резолюцияни қабул қилди, дея хабар берилмоқда БМТ сайтида.
Ҳужжатни 99 та давлат қўллаб-қувватлади, 9 та давлат (Беларусь, Бурунди, Куба, Шимолий Корея, Мали, Никарагуа, Россия, Сурия ва Эритрея) қарши овоз берди, 60 давлат (жумладан, Ўзбекистон) бетараф қолди.
Резолюцияда Россиядан Запорожье атом электр станциясидан зудлик билан ўз ҳарбий хизматчилари ва бошқа рухсат этилмаган ходимларни олиб чиқиб кетиш ва уни тўлиқ Украина назоратига қайтариш талаб қилинган.
Бундан ташқари, ҳужжат Россиядан яна «Украинага қарши агрессияни зудлик билан тўхтатишни» ва «барча қуролли кучларини ушбу мамлакат ҳудудидан халқаро миқёсда тан олинган чегаралари доирасида сўзсиз олиб чиқиб кетишни» талаб қилади.
Овоз беришдан олдин Россиянинг БМТдаги доимий вакили ўринбосари Дмитрий Полянский резолюциядан мақсад «Украинадаги ядровий иншоотларга таҳдидлар манбаси ҳақидаги ёлғон Ғарб версиясини тарғиб қилишга уриниш» эканини таъкидлади.
- Россия қўшинлари 2022 йил февралида кенг кўламли босқинни бошлаганидан кўп ўтмай, Европадаги энг йирик атом электр станцияси бўлган Запорожье АЭСни эгаллаб олган. Ўшандан бери ЗАЭС электр энергиясини ишлаб чиқармайди, лекин унга реакторлардан бирини совитиш учун доимий электр таъминоти керак.
- Босқиндан олдин Запорожье АЭС Украина учун зарур бўлган электр энергиясининг бешдан бир қисмини ишлаб чиқарарди. Станция ҳудуди вақти-вақти билан ўққа тутилади, бунинг учун Украина ва Россия бир-бирини айблайди.
