Франция ҳукумати 2024 йилги ёзги Олимпиада ўйинлари муносабати билан ўтган йил давомида Париждан 5 мингга яқин бошпанасиз мигрантни чиқариб юборди, деб ёзмоқда The New York Times. Уларга бошқа жойда уй-жой ваъда қилинмоқда, бироқ кўплари бегона жойлар кўчаларида қолиб кетмоқда ёки депортацияга ҳукм қилинмоқда.
Нашрнинг ёзишича, одамлар автобусда Лион ва Марсель каби шаҳарларга олиб борилиб, махсус бошпаналарга жойлаштирилмоқда. Уйсизлар у ерда уч ҳафтагача яшайди, шу вақт ичида улар бошпана олиш мезонларига жавоб берадими ёки йўқ — текширилади. Ушбу ҳуқуққа эга бўлганлар ариза кўриб чиқилаётганда узоқ муддатли уй-жой билан таъминланиши мумкин. Бироқ бошпанасиз мигрантларнинг 60 фоизгача қисми уй-жой ололмаяпти, баъзилари эса депортация қилинмоқда.
«Улар сизга тасодифий чипта беряпти, — деди автобуслардан бирида бўлган Марказий Африка Республикаси муҳожири Умар Аламин NYT`га. — Агар билет Орлеангача бўлса, демак сиз Орлеанга кетасиз».
Франция ҳукумати кўчириш Париждаги уй-жой танқислиги фонидаги «ихтиёрий дастур»нинг бир қисми эканини билдирди ва Олимпиада билан боғлиқликни рад этди. Аммо NYT давлат уй-жой фонди ходимидан электрон хат олди, унда бу дастурнинг мақсади айнан «Олимпиада ўтказиладиган жойлар яқинидаги кўча одамларини аниқлаш» ва уларни ўйинлар олдидан бошқа жойга кўчириш экани айтилади.
Газетанинг қайд этишича, кўчириш сабабларидан бири Париж ва унинг атрофида яшовчи 100 минг уйсиз одам учун бошпаналарда жой йўқлигидир. Муаммони ҳал қилиш учун расмийлар ўтган йили мамлакат бўйлаб 10 та вақтинчалик бошпана очган.
Олимпия қишлоғининг ўзи Парижнинг энг қашшоқ чеккаларидан бири, тахминан ҳар учинчи одам мигрант бўлган — Сена-Сен-Денида қурилган. Бу мамлакатдаги энг юқори фоиз, дейилади материалда.
Аввалроқ The Guardian ҳам Париж ва унинг чекка қисмларидаги уйсизларнинг бошқа ҳудудларга кўчирилиши ҳақида ёзган эди. Нашрнинг таъкидлашича, полиция Франция пойтахтини фоҳиша ва гиёҳвандлардан ҳам тозалаган. Нашр маълумотларига кўра, ўтган йилнинг апрель ойидан буён Париждан 12,5 минг киши чиқариб юборилган.
