Тармоқларда 12 июль куни Хива — Андижон йўналишидаги поездда ҳаракатланган ўзбек шоу-бизнеси вакилларининг мурожаати пайдо бўлди. Улар поездда кондиционер тизими ишламаганини билдирган.
Лавҳаларда йўловчи санъаткорлар қўлига елпиғич олиб, ўзини совитаётгани, поезд ойнасини очса-да, у ердан чанг кираётганини айтган. Шунингдек, чипта олинаётганда уларга кондиционер ишлаши айтилгани, бироқ бундай бўлиб чиқмагани ҳақида сўз борган.
«„Ўзбекистон темир йўллари“ чипталарни алдаб сотмайди»
Ўша куни ҳолат юзасидан муносабат билдирган «Ўзтемирйўлйўловчи» йўл давомида мазкур йўловчи поезд вагонида техник носозлик аниқлангани, йўловчилар вақтинча бошқа вагонга ўтказилганини маълум қилди.
«Йўловчилардан совитиш тизими ишламаётган тақдирда, вагон кузатувчиларига, агар муаммо ечим топилмаса, поезд бошлиғига мурожаат қилишлари мумкинлигини таъкидлаб ўтамиз», — дейилади унда.
Эртаси кун АЖ яна бир баёнот берди ва «„Ўзбекистон темир йўллари“ чипталарни алдаб сотмайди» дея таъкидлади. Қайд этилишича, мазкур йўловчи вагон 1991 йилда қурилган бўлиб, ўрнатилган тартибда ўз муддатларида техник таъмирлардан ўтказилган.
«Ушбу вагонга ўрнатилган совитиш тизими, техник шартларига кўра, ташқи ҳаво ҳарорати +40 даражадан юқорилаб кетганда, тизимнинг совитиш самарадорлиги йўқолади. Ҳозирги кунларда мамлакатимиз ҳудуди бўйлаб кузатилаётган аномал иссиқ ҳаво ҳарорати туфайли айрим вагонларнинг совитиш тизимларида носозликлар кузатилмоқда. Видеолавҳага туширилган поезднинг йўл давомида ҳаво ҳарорати +40 даражадан юқорилаб кетгани сабабли совитиш тизимининг компрессор ускунаси ишламай қолган, натижада вагон совитилмаган», — дея таъкидлади АЖ.
«Ўзтемирйўлйўловчи»нинг баёнотига эътибор қаратган иқлимшунос Эркин Абдулаҳатовнинг ёзишича, 2024 йил бошидан буён Ўзбекистонда ҳали аномал иссиқлик кузатилгани йўқ. «Ўзгирдромет»нинг 12 июль учун эълон қилган кунлик об-ҳаво прогнозида шу куни ҳарорат +33…+38 даража, жанубда эса +40…+42 даражагача бўлиши айтилганди.
««Ўзтемирйўлйўловчи»нинг қўшимча қилишича, ўтган асрларда ишлаб чиқарилган йўловчи вагонларининг совитиш тизимлари, ички интерьери, электр тизимлари билан боғлиқ муаммоларни бартараф этиш учун керакли чоралар кўрилмоқда. Шунингдек, вагонлар босқичма-босқич модернизация қилиняпти, охирги 1 йил давомида замонавий талабларга мос бўлган 27 та йўловчи вагонлар харид қилинган.
Рақобатни ривожлантириш ва истеъмолчилар ҳуқуқларини ҳимоя қилиш қўмитасининг маълум қилишича, бундан аввал ҳам ижтимоий тармоқлар орқали шу кўринишдаги танқидий материаллар эълон қилинган ва бу ҳолатларни ўрганиш ҳамда аниқлик киритиш бўйича «Ўзтемирйўлйўловчи» АЖга сўров юборилган.
Қўмита томонидан бу каби ҳолатлар юзасидан тегишли ўрганиш ишлари олиб борилмоқда, ҳолат қўмита назоратига олинган, дейилади хабарда.
