14 июль куни АҚШнинг Пенсильвания штатидаги тарафдорлари билан митинг пайтида собиқ президент Дональд Трампга ўқ узилди, деб хабар берди BBC.
Батлер округидаги сайловчилар олдида сўзга чиққан президентликка номзод нутқи бошланганидан беш дақиқа ўтиб ўнг қулоғига теккан ўқдан жароҳатланган. Уни дарҳол Махфий хизмат агентлари қуршаб олган ва у юзида қон билан саҳнани тарк этган.
Нашр сўзларига кўра, у махсус транспортда шифохонага олиб кетилишидан аввал қўлларини мушт қилган ҳолда бир неча бор «кураш» сўзини айтган.
Трампнинг матбуот котиби Стивен Чунг собиқ президентнинг аҳволи «яхши»лиги ҳақида маълумот берди. У ҳозирда тиббий ёрдам олмоқда, тезкор чоралар кўрилгани учун ҳуқуқ-тартибот органлари ва биринчи ёрдам ходимларидан миннатдор, деди Чунг.
Махфий хизмат вакили Антони Гуглиэльми, FT`га кўра, хавфсизлик чоралари кўрилгани ва айни пайтда собиқ президент «хавфсиз» эканини билдирди. Унинг қўшимча қилишича, ҳозирда хизмат фаол текширувларни олиб бормоқда.
Трампга ўқ узган шахс, шунингдек, митинг иштирокчиларидан бири ҳалок бўлди, деб ёзди Reuters. Агентликка кўра, яна бир кузатувчи оғир яраланган.
Батлер округи прокурори Ричард Голдинжер суиқасд уюштирган шахс ўзини ўзи яралаб ўлганми ёки уни отишганми — аниқ билмаслигини айтди, деб ёзди Washington Post.
CNN`нинг узатишича, ўқ узувчининг шахси ва мақсади ҳозирча аниқ эмас. У Трампни яқин атрофдаги бино томидан туриб отган.
Президент Жо Байден Трампнинг «хавфсиз ва яхши аҳволда»лигини эшитганидан хурсанд эканини айтди. «Америкада бундай зўравонликка ўрин йўқ. Биз мамлакат сифатида бирлашишимиз ва буни қоралашимиз керак», — дея унинг сўзларини келтирди The New York Times.
Ҳозирда АҚШнинг турли штатлари губернаторлари, сиёсатчилар ва таниқли шахслар — республикачи бўлиши ё бўлмаслигидан қатъи назар — ушбу ҳолатни қораламоқда ва Трампга тезроқ соғайишни тиламоқда.
Ижтимоий тармоқ вакиллари айнан ушбу ҳодиса собиқ президентга ноябрдаги сайловларда ғалаба қозонишида қўл келишини тахмин қилмоқда. Шу билан бирга, суиқасд унинг ўзи томонидан уюштирилгани ҳақида гапираётганлар ҳам топилмоқда.
