Исмим Элшод, «Газета.uz» журналистиман. Бир неча кун олдин «Сен дунёга кераксан» кўнгиллилар жамоаси бизни 14 июль кунига белгиланган турга таклиф этди. Ўша куни 40 нафар бола «Меҳрнинг бир куни» акцияси доирасида Тошкент шаҳри бўйлаб турли манзилларга олиб борилди, мақсад уларнинг мана шу кунини унутилмас қилиш эди. Мен ҳам бу жараёнда қатнашдим.
Болалар қандай танлаб олинди?
5 ёшдан 15 ёшгача бўлган 40 боланинг бари Тошкент вилояти Тошкент туманидаги Оқтом ва Тўлабек маҳаллаларидан. Кўнгиллилар жамоаси уларнинг оилаларидаги ижтимоий-иқтисодий вазият билан таниш: маҳалла ва қўни-қўшнилар кўмагида оилалар бўйича маълумот тўпланган. Қайсидир оилаларда фарзандлар отасиз (ёки онасиз ёхуд ҳар иккисисиз) катта бўлмоқда, айримлари эса кам таъминланган. Жамоа бу оилаларнинг баъзиларига олдинроқ ёрдам ҳам кўрсатган. Оилалар, асосан, лойиҳага мурожаат қилиш йўли орқали акция қатнашчиларига айланган.
Манзиллар
Соат 8:00 да иккита автобус болаларни Тошкент ҳайвонот боғи олдида кутиб турарди. Аввалига болаларга «Сен дунёга кераксан» ёзуви 2 тилда туширилган футболкалар кийдириб чиқилди. Буни ҳамроҳликка бириктирилган волонтёр йигит-қизлар бажарди.
Шу куни болаларни 5 та манзилга олиб бориш режа қилинганди — Тошкент ҳайвонот боғи, Ice City, тушлик учун пиццерия, Ракат масжиди ва Локомотив боғи. Барча локацияларга саёҳатлар уларнинг маъмурияти билан келишилган ҳолда бепул ташкил этилди.
Кун қаҳрамонлари аввалига зоопаркка, хусусан, Динопаркка олиб кирилди. У ерда болалар кўнгиллилар ҳамроҳлигида ҳайвонот олами ҳамда Юра даври дунёсига саёҳат қилди. Бу айрим болаларнинг зоопаркка илк ташрифи экан.
Бу — Мадина. Шу куни у 7 ёшга тўлди. Орзуси — ичида бассейни бўлган қизил рангли уйда яшаш.
Иккинчи манзил сифатида Ice City муз саройига борилди. У ерда болалар 1,5 соатга яқин яйради: музли тепаликдан тушиш, қайиқда сайр, поезд саёҳати, яхшиси, фойдаланилган аттракционлар номини келтира қоламан — Viking River, Ice Vertigo, Kamic Ice, Bob Mountain. Ҳа, болалар ҳам, биз ҳам бироз совуқ қотдик!
Шу билан бирпасда тушлик вақти етди. Ёқимли томоша!
Тўртинчи манзил — Яккасарой туманидаги Ракат жоме масжиди.
Борганларни у ерда муассаса ноиби Муҳаммадамин Ҳамдамов кутиб олди. У болалардан нималарга қизиқиши, келажак орзуларини сўради, болаларнинг қўлига масжид ҳақида маълумот ва расмлар акс этган брошюраларни тутқазди. Ҳали ўқишни билмайдиганлар, табиийки, расмларни томоша қилиш билан чекланди.
Сўнгги локация — Локомотив боғи. У ердаги барча аттракционларда учиш учун қулайлик яратиб берилгани сабабли болалар вақти чоғ ўтди.
Олдинроқ китоб, чизиш учун планшетлар, пластилин, тасбеҳ, пазллар, шунингдек, банан ва олмалар билан тўлдирилган пакетлар тайёрлаб қўйилганди, акция сўнгида болаларга ўз совғалари топширилди.
«Сен дунёга кераксан» лойиҳаси ҳақида
Мазкур хайрия лойиҳаси 2019 йилда ташкил этилган бўлиб, Тошкент шаҳри ва Фарғона вилоятида фаолият юритади. Асосан, ёш волонтёрлардан иборат жамоа турли касб эгаларини бир нуқтага бирлаштирган. Жамоанинг Instagram саҳифасида 5,2 мингдан ортиқ обуначиси бор, Telegram`даги гуруҳида эса мингдан зиёд аъзоси мавжуд.
Кўнгиллиларнинг сўзларига кўра, улар ҳар 2−3 ойда Тошкент шаҳри ва вилоятидаги кам таъминланган, боқувчисини йўқотган оилаларга рўзғор маҳсулотлари тарқатади, «Меҳрнинг бир куни» акцияси доирасида болалар учун пойтахтга тур уюштиради. Шунингдек, ногиронлиги бор шахслар, ободонлаштириш ходимлари учун ҳам турли лойиҳаларни амалга оширади.
