Коррупцияга қарши курашиш агентлиги UzAuto Motors компанияси 8 июль куни ўтказган давлат харидида қонун бузилиши ҳолатларини аниқлади.
Унга кўра, компания Nexia 2 автомобилларига бутловчи қисмлар сотиб олиш мақсадида тендер ўтказган. Бошланғич сумма 1,5 миллиард сўм этиб белгиланган, савдо нарх тушиб бориши тартибида амалга оширилган.
Унда иккита корхона иштирокчи сифатида қатнашган: Eko Tsem Komplekt Oborudovanie ва Eko Lit Metall. Якунда биринчи корхона 100 балл ва 1,3 миллиард сўм нарх таклифи билан ғолиб бўлган.
Тендер агентлик томонидан ўрганилганда, ушбу тадбиркорлик субъектларининг раҳбар ва таъсисчилари аффиллангани — яқин қариндош экани аниқланган.
Хусусан, очиқ маълумотларда Eko Tsem Komplekt Oborudovanie МЖЧнинг раҳбари Асқаров Абдурахим Муталович деб кўрсатилган бўлса, унга рақобат қилиши кутилган Eko Lit Metall`ники Муталипов Анваржон Абдурахим ўғли ҳисобланади.
Ушбу ҳолатда «Давлат харидлари тўғрисида»ги қонуннинг бир қатор талаблари бузилгани сабабли буюртмачига харид натижаларини бекор қилиш ҳақида тақдимнома киритилган. Айбдорларга қонуний чора кўриш учун тўпланган ҳужжатлар тегишли органга юборилди, дейилади хабарда.
