Республикачилар партияси Дональд Трампни расман АҚШ президентлигига номзод сифатида кўрсатди. Бу ҳақда Милуокида (Висконсин штати) бўлиб ўтаётган партия йиғилишининг биринчи кунида маълум бўлди, деб хабар бермоқда Sky News.
Трамп Пенсильваниядаги сайловолди митинги чоғида отиб кетилганидан икки кун ўтиб йиғилишда қатнашди. Ушбу ҳолат сиёсатчининг қулоғини яралаганди. Республикачи омма олдига бинт боғлаган ҳолда чиқди.
Трамп вице-президент сифатида Огайо штатидан 39 ёшли сенатор Жей Ди Вэнсни танлади. «Вице-президент сифатида Жей Ди Конституциямиз учун курашни давом эттиради, қўшинларимиз билан бирга бўлади ва Американи буюк қилишда менга қўлидан келган ёрдамни беради», — деб ёзди Трамп Truth Social ижтимоий тармоғида.
Фото: X / SenVancePress.
Жеймс Дэвид Вэнс 1984 йил 2 августда Огайо штатининг Мидлтон шаҳрида туғилган, бироқ болалигини Кентуккида ўтказган. 2003 йилдан 2007 йилгача Вэнс АҚШ денгиз пиёдалари корпусида хизмат қилган, кейин Огайо университети ва Йель ҳуқуқ мактабини тамомлаган. Кейинги йилларда — Сенатга номзод бўлишидан олдин — у венчур капиталист сифатида ишлаган.
Венс 2016 йилда ўзининг шаҳар ичидаги муаммоли болалиги ва Америка оқ ишчи синфининг курашлари ҳақида ҳикоя қилувчи «Ҳиллбилли элегияси» (Hillbilly Elegy) номли мемуарини нашр этиши билан миллий машҳурликка эришди. Китоб бестселлерга айланди.
CNN`нинг қайд этишича, Вэнс Трампни президентлик муддатининг биринчи муддатидан олдин танқид қилган, шунингдек, уни «америкалик Гитлер» ва халқ учун «маданий героин» деб атаган. Бироқ кейинчалик у Трампнинг содиқ тарафдорларидан бирига айланди ва ўтмишда уни танқид қилгани учун узр сўради. Трамп 2022 йилги Сенат сайловларида Вэнс номзодини қўллаб-қувватлади.
Ташқи сиёсат масалаларида Вэнс изоляцион позицияни эгаллайди, деб ёзади Economist. У Исроилни қўллаб-қувватлайди, Тайванга нисбатан аниқ позицияда эмас ва Украинага ёрдам беришга қарши. Интервьюда Вэнc Украинада содир бўлаётган ҳолатга «эътиборсиз эканини» айтганди.
New York Times`нинг ёзишича, Вэнс Трампга 2024 йил ноябрида бўлиб ўтадиган сайловларда ғалаба қозониш учун зарур бўлган «Чанг камар» штатларида (Пенсильвания, Огайо, Индиана, Мичиган ва Иллинойс) қўшимча овозларни қўлга киритишга ёрдам бериши эҳтимоли кам. Нашрнинг ёзишича, Трамп Вэсни MAGA (Make America Great Again) ҳаракатининг вориси сифатида танлаган.
