Флорида суди АҚШнинг собиқ президенти Дональд Трампга нисбатан махфий ҳужжатлар билан нотўғри муомала қилганлик учун қўзғатилган жиноий ишни бекор қилди, деб хабар бермоқда CNN.
Гап 2022 йил ёзида Трампнинг Флоридадаги Мар-а-Лаго мулкида тинтув ўтказилганда топилган материаллар ҳақида кетмоқда. Ўшанда ФҚБ миллий мудофаа билан боғлиқ 11 минг ҳужжатни, шу жумладан «ўта махфий» деб белгиланган ҳужжатларни қўлга киритганди. Трамп, барча собиқ президентлар каби, уларни Миллий архивга ўтказиши керак эди, лекин бундай қилмаган. Айблов хулосаси етти эпизоддан иборат эди. Сиёсатчи ўз айбини тан олмаган.
Қарорни 2020 йилда Трамп томонидан бу лавозимга тайинланган АҚШ округ судьяси Эйлин Кэннон қабул қилди. Суд қарорида айтилишича, махсус прокурор Жек Смитнинг бу ишга тайинланиши конституцияга зиддир.
«АҚШ низом китобида ушбу айбловни олиб бориш учун махсус прокурор Смитни тайинлашга рухсат берувчи бирон бир қонун борми? Ушбу асосий савол синчиклаб кўриб чиқилганидан сўнг, жавоб — йўқ», — дейилади қарорда. Шунингдек, унда Конгресс ғазначиликка Смитнинг ишини молиялаштиришга рухсат бермасликни тайинлагани айтилади.
Шу билан бирга, қарорда Адлия вазирлиги махсус прокурорнинг кейинги фаолиятини молиялаштириш учун «маблағларни қайта тақсимлаши» мумкинлиги, бироқ янги очилган ишнинг суд назоратидан ўтиши аниқ эмаслиги таъкидланган.
Трамп устидан суд жараёни ноябрдаги президентлик сайловлари олдидан бошланиши даргумон бўлса-да, кўплаб ҳуқуқшунослар махфий ҳужжатлар ишини собиқ президентга қарши тўртта ишнинг энг кучлиси деб ҳисоблаганди, деб таъкидлади CNN.
Трампнинг ўзи махфий ҳужжатлар ишини рад этиш «биринчи қадам бўлиши кераклигини» айтди ва унга қарши қолган учта ишни бекор қилишга чақирди.
- Июль ойи бошида Олий суд Трампнинг даъвоси бўйича қарор чиқарганди ва собиқ президентлар расмий хатти-ҳаракатлари учун жиноий жавобгарликка тортилмайди, лекин шахсий равишда содир этилган қилмишлари учун бундай эмас, деган қарорга келганди.
- Махфий ҳужжатлар иши яна президентликка қайтишга уринаётган Трампга қарши очилган тўртта жиноий ишдан биридир. Май ойида Нью-Йоркдаги суд уни порноактрисага қилинган тўловларни яшириш жараёнида ҳужжатларни сохталаштиришда айбдор деб топганди. Судья Олий суднинг президент дахлсизлигига доир қарорини кўриб чиқишга рози бўлганидан кейин, 11 июлга белгиланган ҳукм камида сентябргача кечиктирилди.
- Махсус прокурор Жек Смит Трампни 2021 йил январида Капитолийга бостириб киришга уриниш учун ҳам тергов қилаётган эди. Бу собиқ президентга қўйилган жиноий айбловлар ичида энг жиддийи. Суд жараёни номаълум муддатга қолдирилган.
- 13 июль куни Пенсильванияда сайловолди ташвиқоти митингида Трампга суиқасд уюштирилганди. Собиқ президент қулоғидан яраланган, отишма содир этган шахс ўлдирилган. «Газета.uz» воқеа ҳақида батафсил ёзганди.
