Қурилиш ва уй-жой коммунал хўжалиги вазири Ботир Эркинович Зокиров соғлиғидаги муаммо туфайли лавозимидан озод этилди. Бу ҳақда 17 июль куни президент раислигидаги видеоселектор йиғилишида маълум қилинди.
Вазирнинг биринчи ўринбосари Шерзод Ҳидоятов вазир вазифасини бажарувчи этиб тайинланди. У 2019 йилнинг сентябригача — вазирликка келишидан олдин Вазирлар Маҳкамаси ҳузуридаги Tashkent City Халқаро ишбилармонлик маркази қурилиши дирекциясига раҳбарлик қилган. Унгача эса Akfa компаниялар гуруҳида қурилиш бўйича директори бўлган.
Ботир Зокиров 1963 йилнинг 28 июлида Тошкент шаҳрида туғилган. Тошкент политехника институтини (ҳозирги Тошкент давлат техника университети) қурувчи-муҳандис мутахассислиги бўйича тамомлаган.
1980 йилда Тошкент инструментал заводида меҳнат фаолиятини бошлаган. 1985−1990 йилларда «Тошсантехмонтаж» трестида ишлаган. 1990 йилда эса «12-трест» қурилиш ширкатида иш бошлаб, чилангарликдан бошқарув кенгаши раиси лавозимигача кўтарилган.
2011 йилда бош вазири ўринбосари — Давлат архитектура ва қурилиш қўмитаси раиси этиб тайинланган. 2016 йилда Давлат архитектура ва қурилиш қўмитаси раиси лавозимига тасдиқланган. 2018 йил апрелида Қурилиш вазирининг биринчи ўринбосари, 2019 йилнинг сентябрида эса вазирлик раҳбари этиб тайинланган.
Эслатиб ўтамиз, 2022 йилнинг охиридаги маъмурий ислоҳот давомида Қурилиш ва Уй-жой коммунал хизмат кўрсатиш вазирликлари бирлаштирилганди.
