АҚШ президенти Жо Байденда COVID-19 тести натижалари ижобий чиқди. Бу ҳақда у Х ижтимоий тармоғида маълум қилди.
«Бугун тушдан кейин менинг COVID-19 учун тестим ижобий чиқди, лекин ўзимни яхши ҳис қиляпман ва барчага яхши тилаклар учун раҳмат», — деб ёзди Байден.
Оқ уйнинг аниқлик киритишича, президент бир неча бор эмланган ва касалликнинг енгил белгилари — бурун оқиши ва йўтални бошдан кечирмоқда. Ҳисоботда таъкидланишича, Байден ўзининг уйи жойлашган Делавэр штатига қайтади ва изоляцияланган ҳолда ишлашда давом этади.
- Байден аввал икки марта COVID-19 билан касалланган. Охирги марта у 2022 йил июль ойида коронавирусга чалинганди.
- Байденнинг коронавирус юқтириб олиши республикачи номзод Дональд Трамп билан омадсиз кечган дебатдан кейин уни пойгадан чиқишга чақириқлар кучайиб бораётган бир пайтда юз берди. 81 ёшли президентнинг омадсиз чиқиши Демократик партияда ваҳима ва, унинг ёши инобатга олинса, номзодини қўйиш керакми, деган фикрларни келтириб чиқарди. Кўплаб етакчи сиёсатчилар ва демократлар тарафдорлари уни президентлик сайловларидан воз кечишга чақирган, бироқ Байден ҳозирча буни рад этмоқда.
