Нью-Йоркнинг Бруклин шаҳрида 24 ёшли ўзбекистонлик эркак оиланинг тўрт нафар аъзоси — ўз онаси, акасининг рафиқаси ва уларнинг икки кичик фарзандини ўлдирганликда гумонланиб қўлга олинди, дея хабар бермоқда CBS.
Қурбонлар Мавлуда Файзиева (56 ёш), Мафтуна Ҳакимова (27 ёш), шунингдек, Камила Шавкатова (5) ва Тимур Шавкатов (4) экани аниқланган. Жума куни кечқурун уларнинг жасадлари пичоқланган ҳолда топилган. Гумонланувчининг акаси уйга келганида, хонадон ичида хотини, икки ёш боласи ва онасини пичоқ билан жароҳатланган ҳолда кўрган, сўнгра полицияга қўнғироқ қилган.
The New York Post нашрининг ёзишича, гумондор онасининг жасадини кўрпага ўраб, болаларнинг жасадларини эса кир ювиш саватига солиб, шкафга яширган. Қўшнилар болаларнинг «Ойи, ойи!» дея бақирганини эшитган.
Гувоҳларнинг сўзларига кўра, гумонланувчи аввал бинодан чиқиб кетган, бироқ кейин «Мен айбсизман, мени ҳибсга олинг, бу мен эмасдим», дея бақириб қайтиб келган. Уни қўлига кишан солиб олиб кетишган, эркак якшанба куни судга тортилиши мумкин.
Маълумотларга кўра, оила АҚШга 2007 йилда келган. Улар сўнгги 10 йил давомида Бруклиндаги хонадонда яшаган.
The New York Post нашри гумонланувчи руҳий касал бўлиши мумкинлигини қайд етган. Қўшнилар уни таниган, бироқ уларнинг айтишича, оиласи уни кўчага чиқишга тез-тез рухсат бермаган. Шунингдек, улар эркакни гиёҳванд моддалар истеъмол қилган бўлиши мумкинлигини қўшимча қилган.
