Давлат активларини бошқариш агентлиги «ТошуйжойЛИТИ» лойиҳа институти устав капиталидаги давлат улушининг 61,6 фоизини музокараларга оммавий равишда таклиф қилиш усули асосида сотиш жараёни бошланганини маълум қилди. Хусусийлаштириш агентлигининг консультанти — Abrau Capital.
«ТошуйжойЛИТИ» АЖ турли мақсадлардаги бино ва иншоотларни, муҳандислик тармоқлари, автомобиль йўллари ва йўл инфратузилмасини янгидан қуриш, реконструкция қилиш ва капитал таъмирлаш учун лойиҳа-смета ҳужжатларини ишлаб чиқиш билан шуғулланади.
Институт, шунингдек, қурилишда меъёрий ҳужжатларни, фуқаролик иншоотларининг сейсмик чидамлилиги, фуқаролик иншоотларининг намунавий лойиҳаларини ишлаб чиқиш, бино ва иншоотларнинг техник ҳолатини текшириш ишларини олиб боради, бино ва иншоотларнинг юк кўтарувчи конструкцияларини тиклаш ва мустаҳкамлаш лойиҳаларини ишлаб чиқади, зилзилага чидамли биноларни қуриш соҳасида илмий-тадқиқот ишларини, шу жумладан, лойиҳа-қидирув ишларини олиб боради.
«ТошуйжойЛИТИ» ҳукуматнинг 2010 йилдаги қарори билан Марказий Осиёдаги етакчи зилзилага чидамли турар-жой ва жамоат биноларини лойиҳалаш институти — Тошкент зонал намунавий ва экспериментал лойиҳалаш илмий-тадқиқот институти ҳамда турар-жой ва фуқаролик биноларини лойиҳалашга ихтисослашган бош институт — Тошкент шаҳри миқёсидаги биноларни лойиҳалаш институтини бирлаштириш орқали ташкил этилган.
ДАБА, шунингдек, «Узинжиниринг» республика лойиҳа институти устав капиталидаги 100 фоиз давлат улушини сотиш жараёни бошланганини ҳам эълон қилди. Консультант яна Abrau Capital бўлади.
«Узинжиниринг» компанияси лойиҳаолди ва лойиҳа ҳужжатларини, шу жумладан, ДТИА/ДТИҲ ҳамда ТИА/ТИҲни ишлаб чиқиш, хорижий лойиҳа ташкилотлари томонидан ишлаб чиқилган лойиҳаолди ҳужжатларни техник бошқариш ва Ўзбекистон стандартлари соҳасидаги норматив ҳужжатларга мослаштириш билан шуғулланади.
Институт иқтисодиётнинг базавий тармоқлари лойиҳаларини (лойиҳалаштиришга доир қисмда) техник жиҳатдан кузатиб боради, лойиҳаларни тендер савдолари ташаббускорлари билан биргаликда олиб боради ва уларга ҳамроҳлик қилади.
Шунингдек, тармоқ идоралари томонидан ишлаб чиқилган геология, ёқилғи-энергетика комплекси, кимё, нефткимё ва металлургия саноати объектларини модернизация ва техник реконструкция қилиш концепцияларини кўриб чиқади ва мувофиқлаштиради.
Танловларда иштирок этмоқчи бўлган компаниялар ва уларнинг акциядорлари (иштирокчилари) давлат корхонаси ёки устав капиталида давлат улуши бўлган жамият бўлмаслиги керак. Улар, шунингдек, ЕИ ва АҚШ, йирик халқаро тараққиёт банкларининг оммавий санкциялар рўйхатига киритилмаган бўлиши лозим.
Иккала давлат активларининг харидорлари компанияларнинг асосий фаолиятини камида беш йил давомида сақлаб қолиши керак.
