Ўзбекистоннинг янги тайинланган элчиси Нодир Ганиев Франция пойтахтига етиб келди, деб хабар бермоқда «Дунё» ахборот агентлиги.
Янги элчи шу кунга қадар дастлаб Ўзбекистоннинг Швециядаги муваққат ишлар вакили, 2023 йил октябрь ойидан эътиборан эса — биринчи фавқулодда ва мухтор элчиси лавозимида ишлаган. Стокгольмдаги элчихона 2022 йилда очилган.
Нодир Ганиев 52 ёшда. Тошкент давлат университети (ҳозирги Ўзбекистон Миллий университети)нинг шарқшунослик факультетини битирган.
1994 йилдан буён Ташқи ишлар вазирлиги тизимида фаолият юритиб келмоқда. У марказий аппаратда ва мамлакатнинг хориждаги дипломатик ваколатхоналарида турли лавозимларда ишлаган.
Швецияга тайинланишидан олдин ТИВнинг Европа мамлакатлари ва Европа Иттифоқи институтлари билан ҳамкорлик бошқармасига раҳбарлик қилган.
Ўзбекистоннинг Париждаги аввалги элчиси Сардор Рустамбаев январь ойида Ҳиндистонга элчи этиб тайинланган эди.
