Президент 23 июль куни заргарлик буюмлари ишлаб чиқариш соҳасини ривожлантириш ва уларнинг рақобатбардошлигини таъминлашга доир фармонни имзолади, деб хабар қилди Адлия вазирлиги матбуот хизмати.
2025 йил якунигача қимматбаҳо металлар ва қимматбаҳо тошлардан ясалган заргарлик ҳамда бошқа буюмларнинг йиллик ишлаб чиқариш ҳажмларини 1 миллиард долларга, экспорт кўрсаткичини эса 100 миллион долларга етказиш режалаштирилган.
Ҳужжатга мувофиқ, 2024−2026 йилларда Бухоро ва Наманган вилоятларида биттадан, Тошкент шаҳрида иккита заргарлик маркази ташкил этилиб, у ерларда тадбиркорлар учун зарур инфратузилма яратилади.
2025 йил 1 январгача заргарлик марказларини ташкил этиш учун давлат кўчмас мулк объектларини яхлит мулк сифатида ёки лотлар (қисмлар ва хоналар)га бўлган ҳолда тадбиркорлик субъектлари ва тижорат банкларига узоқ муддатли ижарага ёки мулк ҳуқуқи асосида, қийматини бўлиб-бўлиб тўлаш шартларида реализация қилиш чоралари кўрилади.
Фармонга мувофиқ ташкил этиладиган заргарлик марказларидаги ишлаб чиқарувчиларга қимматбаҳо металларни кечиктириб тўлаш шарти билан сотишда:
- 90 кун ичида амалга оширилган тўловлар қисмига — фоиз ҳисобланмайди;
- 91-кундан бошлаб 180-кунгача амалга оширилган тўловлар қисмига — йиллик 3 фоиз миқдорида фоиз ҳисобланади.
️1 августдан хорижий кўргазма ва ярмаркаларда намойиш этиш учун олиб чиқиладиган тайёр заргарлик буюмларини «вақтинча олиб чиқиш» божхона режимига жойлаштиришда йиғим БҲМнинг 1 баравари (340 минг сўм) миқдорида ундирилади.
2024-йил 1 октябрдан 2027 йил 1 октябргача Ўзбекистонда ишлаб чиқарилмайдиган ҳамда заргарлик соҳасида фойдаланиладиган асбоб-ускуналар, қадоқлаш ва этикеткалаш маҳсулотлари божхона божидан озод этилади.
1 ноябрдан бошлаб хорижда ишлаб чиқарилган ва божхона тўловлари тўланганлигини тасдиқловчи ҳужжатлари бўлмаган заргарлик буюмларини чакана сотувга қўйиш ва сотиш тақиқланади. Бироқ бу тартиб 2024 йил 1 сентябргача расмийлаштирилган (кирим қилинган) заргарлик буюмларига нисбатан татбиқ этилмайди.
Қимматбаҳо металларнинг ҳамда қимматбаҳо металлар билан қопланган металларнинг чиқиндилари ва парчалари лицензия асосида экспорт қилинадиган махсус турдаги товарлар рўйхатига киритилади.
Асиллик инспекциясининг хулосаси бўлмаган ярим тайёр заргарлик буюмларини Ўзбекистон божхона ҳудудидан ташқарига олиб чиқиш ман этилади.
Жисмоний шахсларга оғирлиги 200 граммгача бўлган кумушдан ҳамда 65 граммгача бўлган олтин ва бошқа қимматбаҳо металлардан ясалган тайёр заргарлик буюмларини йўловчи божхона декларациясини тўлдирмасдан, ушбу миқдорлардан ортиқ бўлганларини йўловчи божхона декларацияси асосида Ўзбекистон божхона ҳудудидан ташқарига олиб чиқишга рухсат берилади.
Эслатиб ўтамиз, 2023 йил ноябрь ойида президент фармони билан қиймати 100 млн сўмгача бўлган заргарлик буюмларини декларация тўлдирмасдан олиб чиқишга рухсат берилган эди.
2027 йил 1 январгача Ўзбекистонга олиб кириладиган тайёр заргарлик буюмларига нисбатан импорт божхона божлари 20 фоиздан 10 фоизгача камайтирилади.
2025 йил 1 январгача Тошкент шаҳри, Бухоро, Наманган, Самарқанд ва Хоразм вилоятларида заргарлик буюмларининг асиллигини тезкор текшириш бўйича хизматларни кўрсатувчи шохобчалар фаолияти йўлга қўйилади.
