АҚШ президенти Жо Байден Оқ уйнинг Овал кабинетидан халққа мурожаат қилиб, унда 2024 йилги сайловлардан чиқиш қарорини изоҳлади. Унинг нутқи матни The New York Times нашрида эълон қилинди.
«Сўнгги ҳафталарда мен ўз партиямни бирлаштиришим кераклиги аён бўлди… Мен президент сифатидаги ютуқларим, дунёдаги етакчилигим, Америка келажаги ҳақидаги қарашларим сабаб иккинчи муддатга сайланишимга лойиқман, деб ҳисоблайман. Аммо демократиямизни сақлаб қолиш йўлида ҳеч нарса тўсқинлик қила олмайди. Бу шахсий амбицияларга ҳам тегишли», — дейди у.
Байденнинг айтишича, у олдинга силжишнинг энг яхши йўли «эстафетани янги авлодга топшириш» деб қарор қилган.
«Бу халқимизни бирлаштиришнинг энг яхши усули. Жамиятда кўп йиллик тажрибага эга бўлган одамлар учун вақт ва жой бор эди. Аммо янги овозлар — ҳа, айнан ёш овозлар учун ҳам вақт ва жой бор. Бу вақт ва жой — ҳозир», — деди у.
«Мен бу лавозимни қадрлайман. Лекин мен ўз ватанимни кўпроқ севаман», — деди Байден. «Сизнинг президентингиз бўлиш мен учун шараф. Аммо хавф остида қолган демократияни ҳимоя қилишда менимча, бу ҳар қандай унвондан муҳимроқдир».
Америка раҳбари ўз ваколатининг қолган олти ойида асосий эътиборни президентлик вазифаларига, жумладан, иқтисодиётни ривожлантириш ва фуқаролар ҳуқуқларини ҳимоя қилишга қаратишини таъкидлади. Унинг таъкидлашича, Қўшма Штатлар «Путиннинг Украинани эгаллашига йўл қўймаслик» ва НАТОни мустаҳкамлаш учун давлатлар коалициясини бирлаштиришда давом этади. Байден Ғазодаги урушни тўхтатиш ва барча исроиллик гаровга олинганларни озод қилиш ниятида эканини қўшимча қилди.
Байден, шунингдек, америкаликларни тез орада Демократлар партиясидан президентликка номзод бўлиши кутилаётган вице-президент Камала Харрисни қўллаб-қувватлашга чақирди.
«Мен ўз танловимни қилдим», деб таъкидлади Байден ва Харрисни «тажрибали, кучли, қобилиятли» ҳамда «ақл бовар қилмайдиган шерик» деб атади.
«Американинг ажойиб томони шундаки, уни қироллар ва диктаторлар эмас, балки одамлар бошқаради. Тарих сизнинг қўлингизда. Ҳокимият сизнинг қўлингизда… Шундай экан, келинг, демократиямизни сақлаб, биргаликда ҳаракат қилайлик», — деди АҚШ президенти.
- Байден 21 июль куни партия аъзоларининг номзодликдан воз кечиш ҳақидаги чақириқлари фонида сайлов пойгасидан чиқиш қарорини эълон қилди. Байденга нисбатан босим унинг республикачи номзод Доналд Трамп билан муваффақиятсиз дебатидан кейин кучайди.
