Футбол бўйича Ўзбекистон олимпия терма жамоаси 24 июль куни Франциядаги Олимпиада ўйинларининг гуруҳ босқичи илк учрашувини мағлубият билан бошлади. Ўйин 1:2 ҳисобида якунланди.
Ўзбекистон футбол ассосиацияси учрашувдан сўнг спортчилардан ўйин ҳақидаги фикрини сўради. Хусусан, Олимпия ўйинларидаги Ўзбекистоннинг илк голи муаллифи Элдор Шомуродов «ўйинни ёмон ўтказмаганликларини» айтди.
«Рақибдан келиб чиқиб айтадиган бўлсам, айнан кичик хатолар эвазига ютқаздик деб ўйлайман. Вазифамиз — биринчи навбатда гуруҳдан чиқиш. Ғалаба қозонмаган бўлсак ҳам, гуруҳда ўзимизга тенг бўлган рақибларимиз бор. Шунинг учун, ҳозирча ҳеч нарса йўқотганимиз йўқ. Олдинда муҳим ўйин турибди, шунга тайёргарлик кўрамиз», — деди жамоа фаворити Элдор Шомуродов.
Учрашувда Ўзбекистон дарвозасини ҳимоя қилган Абдувоҳид Неъматов жамоа ўйинга яхши тайёргарлик кўрганини, уларни қўллаб-қувватлаганларга раҳмат айтишини таъкидлади. Унинг айтишича, жамоа Испанияни енгиши учун омад етишмади. У пенальтидан тепилган тўпни қайтарди. Лекин навбатдаги ташкил этилган ҳужумда берилган зарбани эса «аниқ кўрмай қолганини» айтди.
Яна бир футболчи Умарали Раҳмоналиев эса умумий ўйинга баҳо бериб, фақат натижадан ташқари барчаси яхши бўлганини таъкидлади. «Майдонга ғалаба учун тушган эдик, шунинг учун сўнгги дақиқаларда бор эътиборимизни ҳужумга қаратдик. Зич ҳимояни ҳисобни сақлаб қолиш қўлланилади. Испания ҳам ушбу услубдан фойдаланди», — деди у.
Бундан ташқари, Ўзбекистон-Испания ўйинини ФИФА президенти Жанни Инфантино ҳам трибунадан кузатди. У ўзининг расмий саҳифасида бугунги учрашув ҳақида пост қолдирди: «Ўзбекистон ва Испания ўртасидаги Олимпиада очилиш ўйинларидан бирида бўлганимдан жуда хурсандман. Париж барча одамларни бирлаштираётганини кўриш жуда ажойиб. 2024 йилги Олимпия ўйинларидаги ажойиб спорт ҳафтасини интиқлик билан кутяпман!».
Эслатиб ўтамиз, ўзбекистонлик футболчилар кейинги учрашувини «С» гуруҳида 27 июль куни (20:00) Мисрга қарши ўтказади. Ўйин Нант шаҳрининг «Ла Божуар» стадионида ўтказилади. Учинчи ўйин 30 июлда (18:00) Доминикан Республикасига қарши бўлиб ўтади. Уни кўришни истовчилар Париждаги «Парк де Пренс» стадионига боришлари мумкин.
