АҚШ Махфий хизмати (USSS) директори Кимберли Читл ўз агентлиги собиқ президент Дональд Трампга суиқасднинг олдини ололмагани учун танқидга учрагани ортидан истеъфога чиқди, дея хабар бермоқда CNN ва Reuters.
«Сўнгги воқеаларни ҳисобга олган ҳолда, мен сизнинг директорингиз лавозимидан кетиш ҳақида оғир қарорга келдим» — деб ёзган Читл Махфий хизмат ходимларига йўллаган мактубида. У ҳужум куни ташкилот «мамлакат раҳбарларини ҳимоя қилиш» вазифасини бажара олмаганини тан олди.
Президент Жо Байден Читлнинг истеъфосини қабул қилиб, унга давлат хизматидаги ўн йиллик меҳнати учун миннатдорчилик билдирди. У Трампга суиқасд бўйича тергов давом этаётганини қўшимча қилди ва тез орада янги USSS директорини тайинлашга ваъда берди.
22 июль куни Читл Вакиллар палатасининг назорат қўмитаси олдида воқеа юзасидан кўрсатма берди. У Трампга суиқасд «Махфий хизматнинг ўн йилликлардаги энг катта муваффақиятсизлиги» эканини тан олди. Бир неча соат давом этган тингловда Читл конгрессменларнинг отишма содир бўлган Трамп митингида қандай хавфсизлик чоралари кўрилгани ҳақидаги саволларига жавоб беришдан бош тортди. Натижада, тингловлар якунига кўра, одатда ўз партиясидан тайинланганларни ҳимоя қиладиган демократ қонунчилар ҳам уни истеъфога чақирди, деб ёзади The New York Times.
- Республикачилар партиясидан давлат раҳбари лавозимига қайта номзодини қўяётган Трамп 13 июль куни Пенсильванияда сайловолди ташвиқоти митинги чоғида отиб кетилди. Ўқ сиёсатчининг қулоғига теккан. Ҳужум қилган шахс 20 ёшли маҳаллий фуқаро Томас Мэттью Крукс бўлган. У Трамп гапирган саҳнадан тахминан 120−150 метр узоқликдаги бино томидан ўқ узган. Махфий хизмат уни отиб ўлдирган.
- Читл 27 йил давомида АҚШ махфий хизматида ишлаган. У 2022 йилда Байден USSS раҳбари этиб тайинлагунига қадар қисқа муддат хусусий секторда фаолият юритган — PepsiCo компаниясида глобал хавфсизлик бўйича директор бўлиб ишлаган.
