24 июль куни Troll.uz блоги муаллифи Умид Гафуров мазкур тендер бўйича ўз саволларини эълон қилди. Унинг эслашича, 2023 йилнинг сентябрь ойида Сергели туманидаги омборхонада юз берган портлаш оқибатида BYD Uzbekistan компаниясига тегишли бўлган автомобилларга турли хил шикаст етган.
Ўшанда компания «хавфсизлик ва атроф-муҳитни сақлаш» муҳимлигини таъкидлаб, барча шикастланган автомобиллар утилизация қилинишини айтганди.
2024 йилнинг апрель ойида BYD Uzbekistan Factory томонидан 5,7 млрд сўмлик турли шикастланган 850 та автомобилни таъмирлаш бўйича очиқ тендер эълон қилинганди. Гап тўрт эшикдаги энгил, ўрта ва оғир шаклдаги пачоқланишларни бўямасдан бартараф этиш ҳақида кетмоқда.
Гафуров ушбу 850 та машина билан портлашдан зарар кўрган ва утилизация қилиниши керак бўлган машиналар ўртасида боғлиқлик бор-йўқлигига қизиқди.
«Умуман олганда, автомобиль ишлаб чиқариш ва тайёр автомобилларни Хитойдан олиб келиб сотиш билан шуғулланувчи корхона нима сабабдан 900 та автомобилни тузатиш учун тендер эълон қилмоқда?» — деб ёзган у.
BYD реакцияси
Компания матбуот хизмати Сергели туманидаги омборхонада содир бўлган портлаш вақтида «ўша ерда сақланиб турган бир қатор BYD автомобиллари» шикастланганини маълум қилди.
«Ваколатли ҳуқуқ-тартибот идоралари томонидан расмий тергов-суриштирув ишлари якунлангандан сўнг BYD Uzbekistan Factory томонидан жиддий шикастланган автомобиллар (2 дона) утилизация қилиш учун омборга жўнатилди», — дейилади хабарда. Шикастланган машиналарнинг аниқ сони ошкор этилмаган.
Таъкидланганишича, енгил зарар етган (кузовнинг айрим қисмларида кичик пачоқланиш, тирналиш излари) автомобилларнинг бир қисми, шунингдек, Хитойдан ташиб келиш вақтида енгил шикастланишлари бўлган автомобиллар келгусида таъмирлаш учун ажратиб олинган. Айнан шу мақсадда апрель ойида BYD Uzbekistan Factory томонидан BYD автомобиль кузовларини таъмирлаш хизматларининг хариди бўйича очиқ тендер эълон қилинган.
Таъмирга муҳтож бўлган автомобилларнинг шикастланиш даражаси тендер танлови учун техник топшириқда кўрсатилган талабларга асосан тасдиқланди, дейилади хабарда. Компания таъмирланган барча автомобиллар ишлаб чиқарувчи томонидан техник синовдан ўтказилганини маълум қилди.
«Ушбу автомобиллар тизим корхоналарининг ички эҳтиёжлари учун ва шунингдек, шу корхоналарнинг ходимлари ўртасида таъмирлаш ишлари тўғрисида тўлиқ маълумот берилгандан сўнг, завод кафолати сақланган ҳолда чегирмали нархларда сотилмоқда», — дейилади хабарда.
Ишлаб чиқарувчининг маълумотларига кўра, йил бошидаги BYD Chazor ва BYD Song Plus моделлари 2024 йил авлодига янгиланган.
«Автомобилнинг ишлаб чиқарилган йили ва янги авлодини, унинг янгиланган ташқи кўриниши (фейслифтинг) ва VIN-коди орқали осон билиб олишингиз, шунингдек, автомобилларнинг юқорида келтирилган ҳодисалардан олдин ёки кейин ишлаб чиқарилган ёки импорт қилинганлигини аниқлашингиз мумкин. Шаффофликни таъминлаш учун тикланган автомобилларнинг тўлиқ VIN-рақамлари рўйхати тақдим этилган (ҳавола)», — дея қўшимча қилди компания.
BYD Uzbekistan Factory қўшма корхонаси «ўз фаолиятида очиқлик ва шаффофликни таъминлашга содиқлигини» таъкидлади.
Эслатиб ўтамиз, «Ўзавтосаноат» ва Хитойнинг BYD Auto компанияси Ўзбекистонда автомобилларини тўлиқ циклда ишлаб чиқаришни ташкил этишга келишиб олганди. Бунгача томонлар автомобиль бозорини ўрганган.
2022 йилнинг 29 декабрида «Ўзавтосаноат» (60 фоиз улуш) ва «BYD Europe B.V.» (Нидерландия, 40 фоиз) қўшма корхонаси BYD Uzbekistan Factory`ни ташкил этган. 2023 йил 26 сентябрда Ўзбекистон ҳукумати ва инвестор ўртасида лойиҳани амалга ошириш бўйича келишув имзоланган. BYD бренди 2023 йил бошидан буён Ўзбекистонда расман намойиш этилмоқда.
27 июндан завод BYD Chazor ва BYD Song Plus автомобилларини ишлаб чиқаришни бошлади. Президентга қилинган 10 июлдаги тақдимотда Ўзбекистон BYD билан В, С ва бюджет автомобилларини ишлаб чиқариш бўйича келишувга эришгани айтилганди. Уларнинг намуналари хитойлик ҳамкорлар синовидан ўтказиш учун лабораторияга топширилган. Аввалроқ завод 3 та янги модель: E2, Seagull ва Yuan`ни ишлаб чиқаришни режалаштираётгани хабар қилинганди.
