Париж айни дамда катта Олимпия шаҳрига айланган — қаерга қарама Олимпия ҳалқалари туширилган плакатлар ёки шу ҳалқалар рангидаги белги-ишораларга кўзинг тушади. Вокзалда поезддан, аэропортда самолётда тушасанми, сени биринчи бўлиб Олимпиада рамзларини кўрасан.
Шаҳарнинг сайёҳлар тўпланадиган асосий масканлари, эътиборга молик бино-иншоотлари ҳам Олимпиада руҳида безатилган. Масалан, Ғалаба аркаси:
Айни вақтда, Ўйинларга расман старт берилишидан аввал бундай осори-атиқаларнинг ҳаммасига ҳам аввалгидек яқинлашиш имкони йўқ эди. Масалан, Париж мэрияси олдида турли маданий тадбирлар учун саҳналар ҳозирланган бўлиб, Олимпиададан аввал уларга кириш имкони йўқ эди — сайёҳлар ҳам узоқ-узоқдан суратга тушишга мажбур бўлаётганди.
Нафақат Париж, балки Франциянинг ташриф қоғозчаларидан бири ҳисобланган Эйфель минораси билан ҳам худди шундай вазият юзага келганди — Ўйинлар бошланишидан аввал унга яқинлашиш имкони йўқ эди.
Умуман олганда, шаҳарда хавфсизлик чоралари жуда кучайтирилганди. Кўчаларда қуролланган ҳуқуқ-тартибот органлари ходимларини, ҳатто ҳарбий хизматчиларни кўриш одатий ҳол. Улар билан бирга махсус яшил либосдаги волонтёрларга ҳам кўп дуч келасиз.
Аммо бу Париж аҳли ва меҳмонларининг байрамона кайфиятига зиғирча салбий таъсир кўрсатаётгани йўқ — деярли ҳамма хурсанд, ҳамма шод, Ўйинлар очилишини орзиқиб кутмоқда.
Эслатиб ўтамиз, Олимпиада, расмий очилиш маросими ўтказилмай туриб, аллақачон бошланиб бўлган. Хусусан, 24 июль куни ўзбекистонлик футболчилар Испанияга қарши майдонга чиқиб, 1:2 ҳисобида мағлубиятга учради. 25 июль куни эса ўзбекистонлик камончилар — Зиёдахон Абдусатторова ва Амирхон Содиқов дебют қилди.
Ўйинларда Ўзбекистондан 19 та спорт тури бўйича 75 та йўлланма билан жами 90 нафар спортчи қатнашади — мамлакат Олимпиадада илк бор бунчалик кўп спортчи билан қатнашмоқда. Ўзбекистонликлар бу сафарги Ўйинларда футбол, камондан ўқ отиш, сувга сакраш ва аёллар ўртасида кураш турлари бўйича дебют қилади. Олимпиада 11 августга қадар давом этади.
